«Памерлых з прычыны пнеўманіі няма»: стаўбцоўская раёнка апублікавала ўласны матэрыял пра захворванні ў раёне
Стаўбцоўская афіцыйная газета «Прамень» апублікавала вялікі матэрыял за подпісам галоўнага рэдактара Нэлі Астрэйка, дзе спрабуе адказаць на публікацыі пра Стоўбцы ў інтэрнэце.
«Загалоўкі некаторых інтэрнэт-рэсурсаў нагадваюць зводкі з палёў Вялікай Айчыннай вайны. На якой канапе яны нараджаюцца і якіх серыялаў наглядзеліся іх аўтары, застаецца толькі здагадвацца, — пачынае галоўны рэдактар. — Яскравы прыклад невуцтва на гэтым тыдні дэманструе адзін з рэсурсаў прысталічнага рэгіёну: «Стоўбцы сталі новым эпіцэнтрам каранавіруса. Колькасць памерлых ужо перавысіла адзін дзясятак … Мясцовая бальніца перапоўненая, а койкамі заставілі нават сталовую…» Рабяты, вы сур'ёзна? Са смерцю і хваробай не жартуюць, але тут такое ўражанне, што піша школьнік, які ўяўляе сабе бальніцу як нешта сярэдняе паміж амерыканскім блокбастарам і сваёй жа школай. Няма ў шпіталях велізарных сталовых — ад слова зусім!»
Але зразумець рэальныя лічбы з матэрыяла складана.
«У бальніцы з першага дня паступлення пацыента з COVID-19 праводзіцца сартаванне з пнеўманіямі ў залежнасці ад цяжару стану чалавека: цяжкія, кіслародазалежныя, няцяжкія. Згодна з распрацаваным планам з улікам таго, што з 30 сакавіка па 13 красавіка ў бальніцу ішло актыўнае паступленне хворых з цяжкімі пнеўманіямі, для аказання аператыўнай дапамогі іх пачалі пераводзіць у іншыя раёны. Так, пацыенты са Стоўбцаў атрымліваюць дапамогу ў Капылі, Валожыне, Мар'інай Горцы, Салігорску і на абласным узроўні.
З 17 красавіка сітуацыя стабілізавалася. Зараз пнеўманіі актыўна выяўляюцца ў большасці выпадкаў у тых пацыентаў, якія ўжо знаходзяцца на бальнічным, часцей за ўсё пры паўторных аглядах.
Пераведзена з рэанімацыйнага аддзялення 8 пацыентаў. Знаходзяцца зараз на этапе падрыхтоўкі да выпіскі 14 пацыентаў з пнеўманіямі.
Памерлых з прычыны пнеўманіі ва УАЗ «Стаўбцоўская ЦРБ» няма.
«Што тычыцца тэмы павышанай смяротнасці ў раёне, то вельмі раім канапным блогерам павывучаць статыстыку. Гэтаму, дарэчы, вучаць ва ўніверсітэтах — не выдаваць неправераную інфармацыю», — зазначае галоўны рэдактар.
«За перыяд са студзеня па сакавік 2019 года ў раёне было зарэгістравана 254 памерлых, а за гэты ж перыяд 2020 года - 241 памерлы. Высновы, як той казаў, рабіце самі…»
«Адзначым таксама, што з 1 красавіка ўжо 30 пацыентаў з пнеўманіямі скончылі лячэнне, за тыдзень закрыты 383 лісткі непрацаздольнасці па прычыне ВРВІ і вострага бранхіту».
«І ўлічваючы, што многія канапавыя блогеры тэлефануюць галоўурачу і пытаюцца: ці не ўцёк ўвесь медыцынскі персанал за мяжу, адказваем — не, не ўцёк. Бальніца працуе стабільна. Так, безумоўна, складана і цяжка. Вядома ж, ёсць пацверджаны COVID-19 і сярод медработнікаў, і ў пацыентаў. Але на сённяшні дзень усе адчуваюць сябе здавальняюча. Сродкамі абароны: касцюмамі, рэспіратарамі, маскамі, шчыткамі — медработнікі забяспечаны ў поўным аб'ёме», — сканчае матэрыял Нэлі Астрэйка.
Каментары