«Я ледзь не памёр, але назаўсёды запомніў, што такое «бэз». Спявак Майкл Соул расказаў, як вучыў беларускую мову на трэнажорах
Майкл Соул стаў першым удзельнікам забаўляльнага шоу, дзе вядоўца выпрабоўвае на трываласць як фізічную падрыхтоўку ўдзельніка, так і яго ўзровень валодання беларускай мовай. На чарзе — Ягор Кіпа.
Грамадская кампанія «Годна» сумесна з «Арт Сядзібай» запускае «Мова Challenge». Мэта праекта — ладзіць незвычайныя ўрокі беларускай мовы для беларускіх селебрыці.
Першым вучнем стаў удзельнік маштабных тэлепраектаў «X-Фактар», «Ліга смеху», «Голас країни», фіналіст нацыянальнага адбору на Еўрабачанне 2016 года — Майкл Соул. А ў якасці навучальнага класа была абрана трэнажорная зала Gym24.
Ідэя праекта простая: падчас таго як удзельнік «Мова Challenge» займаецца на трэнажоры, вядоўца кажа яму слова па-беларуску, якое ён мусіць перакласці на рускую мову. І наадварот — з рускай на беларускую. У выпадку, калі чалавек не ведае перакладу, хуткасць на трэнажоры паскараецца.
Падчас чэленджу мы даведаліся, што ўзровень англійсікай і ўкраінскай моваў у Майкла значна вышэйшы за ўзровень валодання беларускай. Сітуацыя не самая радасная, але менавіта дзякуючы «Мова Challenge» сам Майкл зразумеў і адчуў, што гэта варта выпраўляць. Пасля чаго зрабіў высновы, што трэба брацца за вывучэнне беларускай мовы. І так будзе з кожным!
Такім чынам, мерапрыемства носіць адукацыйна-спартыўны характар. Але, перш за ўсё, безумоўна, забаўляльны.
У наступным выпуску ў якасці вучня выступіць Ягор Кіпа. Ягор — лідар гурта «Басота», блогер, менеджар Бакея і проста гарадскі вар’ят.
Каментары