Расія выпрабоўвае электрамагнітныя гарматы: што гэта за зброя і чым яна страшная
Далёкасць гарантаванага знішчэння цэляў расійскімі электрамагнітнымі гарматамі, што праходзяць палігонныя выпрабаванні, даведзена да 10 км. Раней яны маглі эфектыўна страляць на дыстанцыю 1-2 км. Пра гэта паведамілі tass.ru крыніцы ў абаронна-прамысловым комплексе РФ.
Выпрабаванні электрамагнітнай зброі ідуць з 2015 года.
Адна з крыніц адзначыла, што «знішчэнне лятальных апаратаў на дыстанцыі ў 10 км забяспечваецца за кошт спальвання электронных кампанентаў іх бартавой апаратуры». Суразмоўца дадаў, што стрэл электрамагнітнай гарматы доўжыцца мілісекунды і, улічваючы адлегласць да цэлі, дасягае яе імгненна, бо электрамагнітнае выпраменьванне пашыраецца з хуткасцю святла.
Крыніцы адзначылі, што на выпрабаваннях расійскія ЭМВ-гарматы спальвалі без магчымасці аднаўлення розныя прыборы на зямлі, а таксама эфектыўна знішчалі беспілотнікі. Па словах суразмоўцаў, галоўнай праблемай такой зброі на сёння застаецца патрэба ў вялікіх аб'ёмах электраэнергіі, таму мабільны ўдарны ЭМВ-комплекс у найбліжэйшай перспектыве стварыць не ўдасца.
Суразмоўцы таксама растлумачылі, чым ЭМВ-зброя розніцца ад сістэм радыёэлектроннай барацьбы (РЭБ). Большасць сучасных комплексаў РЭБ могуць ствараць перашкоды для электронікі праціўніка на адлегласці ў некалькі сотняў кіламетраў, аднак яны маюць несувымерна меншую магутнасць і не выводзяць прыборы з ладу. ЭМВ-гарматы знішчаюць апаратуру на фізічным узроўні.
У ЭМВ-гарматах выкарыстоўваецца электрамагнітнае выпраменьванне звышвысокай частаты, таксама званае электрамагнітным «стрэлам». Выпраменьванне электрамагнітнай гарматы за долі секунды разагравае цэль да вельмі высокіх тэмператур.
Такой зброяй, у прыватнасці, плануецца абсталёўваць беспілотны варыянт знішчальніка 6-га пакалення. На пілатаваным самалёце электрамагнітную зброю ўжываць небяспечна, бо яна можа зашкодзіць уласнаму лётчыку.
Цяпер чытаюць
Лукашэнка апраўдваецца за ідэю з прыездам 150 тысяч пакістанцаў — гэта, каб «захаваць наш народ»26
Каментары