Ганна Севярынец пра беларускі пратэст: Гэта глабальны зрух, як ён здзьмецца? ВІДЭА
Ганна Севярынец — педагог, даследчыца літаратуры, пісьменніца — стала новым героем інтэрв'ю Мікіты Мелказёрава на канале «Жыццё-маліна». У размове Ганна падзялілася сваім бачаннем будучыні беларускага пратэсту.
«Гэты пратэст такога кшталту, што не можа здзьмуцца, ён убудаваны ў гэта грамадства, у гістарычную сітуацыю, у сусветныя інтэлектуальныя трэнды, экзістэнцыйна. Я на гэты пратэст не магу глядзець інакш, як на тое, што, напрыклад, рака цячэ — ён абсалютна натуральны. І тое, як ён праходзіць, і тое, што ён не мог не здарыцца.
Мала таго, што ён уключаны ў 30-гадовы цыкл, пра які толькі лянівы не напісаў: з 1795 года на Беларусі кожныя 30 год (плюс-мінус год) нешта такога кшталту адбываецца. Ён так зарыфмаваны з усім, нават з зоаабаронным рухам: ён зрабіў вельмі шмат для таго, каб гэты пратэст быў, і быў менавіта такім.
Усе гэтыя модныя сучасныя дыскурсы пра victim blaming, пра аб'юз, пра харасмент — гэта ўсё абсалютна дакладна рыхтавала цяперашні працэс, бо ў нас жа працэс не зусім палітычны, гэта проста трыгерам стала, — у нас мяняецца фармацыя светаўспрымання, манера існаваць у прасторы. Гэта глабальны зрух, як ён здзьмецца, калі ён абумоўлены развіццём чалавецтва?
Я адназначна веру ў перамогу. Зразумела, я бываю, як і ўсе, на арэлях, асабліва вечарам, калі стомішся, акажашся ў поўным адчаі, але не таму, што не будзе перамогі, а таму, па-першае, што людзі пакутуюць, і таму, па-другое, што вылазіць столькі гадасці ў людзях. Ты разумееш, што яна ёсць у людзях і была, але назіраць яе фізічна вельмі цяжка. Як Зміцер Дашкевіч кажа мне: «Уяві сабе, якая цяпер адбываецца мыйка!»
Чалавек жа такая істота, ён можа пражыць 80 год — і ніхто не будзе ведаць, што ў ім сядзіць гадаўка. І ён сам пра сябе гэтага не будзе ведаць. А тут раз — і яго вылезе абсалютна ў дзікім выглядзе. І яно цяпер з усіх вылазіць: і гадаўкі, і героі — усё найлепшае і найгоршае. І перажыць гэта вельмі цяжка. А так перамога абавязкова будзе, абавязкова».
Цяпер чытаюць
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу7
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх1919
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх19
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1818
Каментары