«Несправядлівасць раніць больш за кулі». Год таму сілавік страляў у журналістку НН, крымінальнай справы няма дагэтуль
Піша Наталля Лубнеўская. Яе паранілі гумавай куляй 10 жніўня — адзін з байцоў, меркавана, «Алмаза», спыніўся за 10 метраў ад групы журналістаў у сініх камізэльках «Прэса» і прыцэльна стрэліў з агнястрэльнай зброі. Рэпарцёрка правяла ў бальніцы 38 дзён.
Памятаю, як недзе праз тыдзень у бальніцу прыехалі дэпутаткі — Марыя Васілевіч і Ірына Луканская (у мінулым галоўны доктар гродзенскай дзіцячай паліклінікі). Нас у палаце было двое пацярпелых: другая дзяўчына — гэта Маша Зайцава, якую аглушыла і моцна параніла святлошумавой гранатай (Маша цяпер у Чэхіі, і калі раны зацягнуліся, то слых на адно вуха так і не вярнуўся). Дэпутаткі распытвалі, ці патрэбна нам якая дапамога. Спачувалі. На прапанову асудзіць гвалт і фальсіфікацыі рэціраваліся: маўляў, што ад нас залежыць, мы дробныя людзі, няма паўнамоцтваў.
Але магу расказаць пра запыты, якія прыходзілі рэдакцыі. Прасілі то характарыстыку на мяне, то копію майго службовага задання на 10 жніўня, то пацверджанне, што я прайшла інструктаж па ахове працы. Можна падумаць, там ёсць пункт, як уварочвацца ад куляў.
Супрацоўнікі органаў апраўдваюць свае дзеянні тым, што «проста выконваюць сваю работу». У маім выпадку выканаць сваю работу ніхто не змог. Відэа выстрэлу і факт знаходжання ў бальніцы аказаліся недастаткова пераканаўчымі, каб завесці крымінальную справу. «Працягваецца праверка».
Маё здароўе цалкам аднавілася — дзякуй ЛФК, фізіятэрапіі і маладосці. Застаўся выродлівы шрам (след ад гвалту, якога афіцыйна не было) — але хіба гэта сістэма пакідае пасля сябе хоць штосьці прыгожае? Унутры шмат нецэнзурных слоў і эмоцый. Толькі гэты год зрабіў мяне яшчэ больш стрыманай — я вельмі рэдка плачу, бо цяпер не час агаляць душу. Але ведаю, што выплачу ўсё слёзы, калі мае калегі будуць на волі.
Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»17
Каментары