Галоўны монстр 2022 года: хто такі Хагі Вагі, ад якога ўсе фанацеюць?
Гэтая цацка з не надта прывабным відам набыла папулярнасць сярод дзяцей ў пачатку гэтага года і не сыходзіць у цень дагэтуль. Разбіраемся, што вядома пра сіняга монстра.
Хагі Вагі — гэта персанаж хорар-гульні Poppy Playtime. Па сюжэце гульні галоўны герой, экс-супрацоўнік фабрыкі цацак Playtime Co., вырашае расследваць таямнічае знікненне калег. Для гэтага ён накіроўваецца на тую самую фабрыку і ходзіць па закінутых памяшканнях, спрабуючы аднавіць карціну падзей.
Калі герой адчыняе дзверы ў вестыбюль фабрыкі, ён сустракае там Хагі Вагі. Па фігуры гэтая істота крыху падобная да чалавека, вось толькі яна мае сіні мех, трохвугольную галаву, вялікія чырвоныя вусны і велізарную ўсмешку з некалькімі радамі зубоў.
Спачатку Хагі Вагі быў добразычлівым, але пасля аварыі на фабрыцы змяніў свой настрой. У героя атрымліваецца аднавіць падачу энергіі на панэль кіравання, і пасля гэтага сіні монстр пачынае за ім ганяцца. Калі не паспееш выратавацца, Хагі Вагі зловіць цябе і з’есць, і не забудзе перад гэтым шырока ўсміхнуцца, каб паказаць свае вострыя зубы. Варта берагчыся абдымкаў Хагі Вагі, бо ў яго яны смяротна небяспечныя.
Першая глава гульні выйшла ў кастрычніку 2021 года, працяг чакаюць у гэтым годзе. Але сіні монстр ужо пайшоў у народ — настолькі, што яго вобраз абрастае новымі дэталямі. Напрыклад, тыктокеры прыдумалі для Хагі Вагі раман з іншым монстрам, падобнай да яго, толькі ружовай Кісі Місі (іншыя мяркуюць, што яна — мама ці сястра Хагі Вагі). У першай главе Poppy Playtime можна пабачыць выяву Кісі Місі на сценах фабрыкі, але яе саму пакуль што нам не прадставілі.
Дзіўная цацка атрымала вялікую папулярнасць сярод дзяцей і падлеткаў. Хагі Вагі ў форме мягкай цацкі скупаюць па ўсім свеце, як і яго сяброў: акрамя Кісі Місі, у серыі ёсць рознакаляровы Лілі Мілі, аранжавы Ван Панк, шэры Грыс Віс, чырвоны Скары Лары і нават зялёны Сілі Білі.
У асноўным Хагі Вагі раскруцілі стрымеры камп'ютарных гульняў, але сапраўднай зоркай істота стала ў тыктоку. Відэа з гэтым сінім монстрам набіраюць шмат праглядаў, а сам Хагі Вагі ўжо стаў героем мноства мемаў.
Першы з іх — фраза «У нас знік сіні Хагі Вагі». Яна прагучала ў відэа ютубера Скорці, які праходзіў гульню GTA V з модам, што дазваляў дадаваць у яе Хагі Вагі рознага колеру. Скорці прамаўляў яе, калі сіні Хагі Вагі згараў на вогнішчы. Тыктокеры ж пачалі выкарыстоўваць гэтыя словы, калі жадаюць расказаць пра максімальна вялікае расчараванне.
Скорці і яго відэа далі пачатак яшчэ двум мемам пра Хагі Вагі. Першы з іх — словы «Да ладна, глядзі! Гэта бабуля Хагі Вагі». Скорці прамовіў іх, калі знайшоў у адной з лакацый гульні павялічаную копію Хагі Вагі, на якой былі ружовыя акуляры, і вырашыў, што гэта бабуля монстра. Зараз жа іх выкарыстоўваюць, каб распавесці пра «старамодныя» якасці маладых людзей — напрыклад, пра любоў да вязання ці метэазалежнасць.
Яшчэ адзін мем ад Скорці гучыць так: «Афігець, нашаму Хагі Вагі тысяча гадоў». Прамаўляюць яго, каб распавесці пра розніцу ва ўзросце і тое, як часам хутка ляціць час.
Шмат хто зразумее мем «Да хто такі гэты ваш Хагі Вагі». Пачуць яго можна ў роліках, дзе дарослыя тыктокеры дзівяцца любові дзяцей да сіняга монстра і расказваюць, як не паспяваюць за новымі трэндамі.
Фанаты Хагі Вагі з твітара не адстаюць ад тыктокераў. Вось некалькі прыкладаў таго, як у гэтай сацсетцы згадваюць сіняга монстра і мемы з ім:
Нет нет нет.. Синий Хаги Ваги... Он сгорел, почернел...
— †огнедышащий тапок† (@_Shon_Fresto) August 3, 2022
Снимал с бочки ржавчину называется... pic.twitter.com/DEGZTwoQX1
Хаги ваги нетнетнет брат он сгорел, почернел pic.twitter.com/0iDkswlqoi
— Sasha Gav (@ganvvie) July 29, 2022
о мой бог, нашему хаги ваги тыща лет. #МояГодовщинаВТвиттере pic.twitter.com/17vMeVPDc8
— катевана (@katevaan) August 1, 2022
Сейчас 3-летние дети:
— ATLANT (@kg_atlant) July 26, 2022
— Кими миси, Хаги ваги. https://t.co/aFWj90m8JM
НЕТ НЕТ ХАГИ ВАГИ ОН СГОРЕЛ ПОЧЕРНЕЛ(((
— Шутняра (@JaketheCourier) August 1, 2022
А вообще классно конечно, машина отъездила добросовестно гонку, а потом такая «А гори оно всё!» pic.twitter.com/Koj8oI7dei
Папулярнасць Хагі Вагі выклікае ў некаторых дарослых засцярогу. Напрыклад, вясной 2022 года паліцыя і супрацоўнікі брытанскіх школ папярэджвалі бацькоў, што іх дзеці могуць глядзець у сеціве ролікі з Хагі Вагі змрочнага характару. Імя Хагі Вагі ўтворанае ад брытанскага hug (абдымацца), таму гэтага персанажа цяжка «западозрыць» у дрэнным уплыве на дзяцей. Але бацькоў пужае як знешнасць Хагі Вагі і яго характар, так і тое, што ім амаль немагчыма даведацца, ці глядзіць іх дзіця відэа з гэтай істотай.
У любым выпадку, псіхолагі рэкамендуюць не купляць Хагі Вагі для дзяцей ва ўзросце 4-6 гадоў, бо незвычайная цацка можа напужаць такое дзіця, нават калі ў самым пачатку яно гэта не ўсведамляе. Што да старэйшых дзяцей, то ім Хагі Вагі наўрад ці нанясе псіхалагічную траўму.
«Наша Нiва» — бастыён беларушчыны
ПАДТРЫМАЦЬ
Каментары