Расіяне руйнуюць украінскія гарады. Ударам падвергліся Кіеў, Дняпро, Мікалаеў
Некалькі ўкраінскіх гарадоў падвергнуліся абстрэлу раніцай 18 кастрычніка. Па ўсёй тэрыторыі Украіны была абвешчана паветраная трывога.
У аўторак расійскія войскі нанеслі два ракетныя ўдары па аб'екце энергетычнай інфраструктуры ў Дняпры, у выніку чаго на ім пачаўся пажар. Некаторыя раёны горада засталіся без электрычнасці і водазабеспячэння, пасля атакі абясточаная адна з помпавых станцый «Дняпроводаканала».
Мэр Харкава Ігар Церахаў паведаміў, што ў горадзе трапіў пад абстрэл раён аднаго з прамысловых прадпрыемстваў. «За пяць хвілін было дзве серыі выбухаў», — напісаў ён у тэлеграм-канале. З-за выбухаў у Харкаве прыпыненая праца метро.
Яшчэ два «прылёты» па аб'екце энергазабеспячэння зафіксаваныя ў Жытоміры, а таксама тры ўдары па інфраструктурным аб'екту на Левым беразе Кіева, заявіў намеснік кіраўніка Офіса прэзідэнта Украіны Кірыл Цімашэнка. У абодвух гарадах назіраюцца перабоі з энергазабеспячэннем.
Таксама паведамлялася аб ударах па Крывым Розе і Мікалаеве. Па звестках кіраўніка Мікалаеўскай абласной адміністрацыі Віталя Кіма, ракетныя ўдары ў Мікалаеве прыйшліся па кветкавым рынку і двухпавярховым доме. Пазней у ім пад заваламі знайшлі цела загінулага мужчыны.
Цяпер чытаюць
Даішнік, якога збіў машынай пенсіянер пад Мінскам, памёр у бальніцы. Яму зладзілі пышнае пахаванне18
Каментары