Максім Шабуцкі атрымаў пазыўны Хокінг і распавёў пра свае ўражанні ад падрыхтоўкі ў навучальнай роце.
Прэс-служба палка Каліноўскага апублікавала відэа з навучальнай роты — фінальнай падрыхтоўкі рэкрутаў палка перад размеркаваннем у баявыя падраздзяленні і тылавую службу.
Імя Шабуцкага не называецца, але байца з пазыўным Хокінг можна пазнаць па голасе.
Па словах Хокінга, узровень падрыхтоўкі рэкрутаў палка нашмат вышэйшы, чым ён чакаў, і, у першую чаргу, «дзівіць колькасць боепрыпасаў», якія яны выкарыстоўваюць. «Сярэднестатыстычны баец тут за два-тры дні страляе больш, чым сярэднестатыстычны салдат у беларускай арміі».
Ён адзначыў працу і ўзровень інструктараў, «якія прайшлі па некалькі гарачых месцаў, і гэта не тэарэтычная падрыхтоўка, гэта баявая падрыхтоўка. Узровень здзіўляе».
Хокінг знаходзіцца ў вучэбнай роце тры тыдні. Ён распавёў, што сярод рэкрутаў — людзі вельмі розныя, у яго атрадзе, напрыклад, ёсць кандыдат навук.
Паводле яго, 95 працэнтам байцоў, з якімі ён трэніруецца, — «не месца тут». «Гэта людзі, якія патрэбныя былі б у Беларусі. Тут шмат інжынераў, праграмістаў, лекараў».
Але сітуацыя так склалася, тлумачыць Хокінг, што «беларуская баязлівая армія адмовілася выконваць прысягу», таму «народ павінен сам стаць войскам». Менавіта гэта цяпер і адбываецца, лічыць Шабуцкі.
«Мне здаецца, што полк Каліноўскага — гэта адзіная апора беларускага народа, якая можа нешта змяніць», — сказаў ён.
Шабуцкі — былы міліцыянер. Ён стаў вядомы сваімі відэа на ютубе, якія запісваў, паводле яго слоў, у поўнай канспірацыі, увесь час хаваючыся ў Беларусі ад пераследу.
У красавіку 2022 года Шабуцкі здолеў пакінуць Беларусь.
Цяпер чытаюць
Беларусы горача спрачаюцца, ці варта прывязваць дапамогу на дзіця да заробку маці2
Каментары