Як сумяшчаць алкаголь і трэніроўкі і найменш шкодзіць арганізму
Спалучэнне алкаголю і спорту — так сабе ідэя. Арганізму патрэбны час для аднаўлення пасля ўжывання моцных напояў, і спорт у гэты перыяд можа стаць дадатковым шокам для яго. Тым не менш існуюць агульныя рэкамендацыі, якія трэба ўлічыць тым, хто вырашыў сумясціць трэніроўкі і алкаголь. Мы звярнуліся да дасведчанага доктара-нутрыцыёлага, каб даведацца, як найлепшым чынам вярнуцца да фізічнай нагрузкі пасля бурнай вечарынкі.
(Імя медыка не прыводзіцца з меркаванняў бяспекі.)
Алкаголь і трэніроўкі — сумяшчаць цi не?
Этанол, які ўтрымліваецца ў алкаголі, ёсць моцным таксінам. Калі ён трапляе ў арганізм, усе ўнутраныя сістэмы пачынаюць працаваць на тое, каб нейтралізаваць «атруту» і хутчэй яе вывесці. Каб разумець, што адбываецца з вамі падчас кактэйльнай вечарынкі, трэба ведаць тры этапы, як адбываецца ап'яненне і далейшае ачышчэнне.
Першы этап. Алкаголь трапляе ў кроў, усмоктваючыся праз сценкі страўніка і дванаццаціперснай кішкі. Хуткае ап'яненне «на галодны страўнік» тлумачыцца гэтым прынцыпам усмоктвання — з'едзеная ежа замінае кантакту алкаголю са сценкамі страўніка і тонкай кішкі, але, калі вы забыліся паесці, гэтага бар'ера ў вас няма і спірт усмоктваецца практычна імгненна.
Другі этап. Чалавек пачынае адчуваць ап’яненне праз 15—30 хвілін пасля ўжывання спіртнога, калі алкаголь трапляе ў кроў. На стадыі транспарціроўкі кровазвароту патрэбна толькі 90 секундаў, каб зрабіць поўны круг і данесці этанол да ўсіх сістэм арганізма.
Трэці этап. Печань пачынае выпрацоўваць ферменты, якія расшчапляюць спірт, і запускаецца працэс дэтаксікацыі. Сярэдняя хуткасць, з якой тое, што выпілі, выводзіцца з арганізма, складае 0,10—0,16 праміле за гадзіну, але дакладны час залежыць не толькі ад колькасці спірту ў крыві, але і ад асаблівасцяў працы арганізма ў цэлым.
Паскорыць працэс дэтаксікацыі немагчыма. Праз пот, мачу і дыханне выходзіць толькі каля 10% алкаголю. Кава і халодны душ могуць даць пачуццё бадзёрасці, аднак не выведуць этанолу. Так, даросламу чалавеку сярэдняй камплекцыі спатрэбіцца сем гадзін, каб поўнасцю ачысціць свой арганізм ад трох кактэйляў з 5% алкаголю ў саставе.
Арганізм спрабуе даць рады наступствам атручвання, і дадатковая фізічная нагрузка можа яго перагрузіць. Таму паміж умеранай выпіўкай і трэніроўкай павінна прайсці не менш за чатыры гадзіны, а лепш наогул адкласці заняткі на 25 гадзін.
Як захаваць здароўе, калі выпіў перад трэніроўкай
Алкаголь дзейнічае як мачагоннае, i яго ўжыванне можа прывесцi да дэгідратацыі. Змяншэнне вадкасці ў кровазвароце ўплывае на частату сардэчных скарачэнняў, таму на кожную порцыю алкаголю варта выпіваць адну шклянку вады — яна абароніць ад абязводжвання. Пачуццё смагі на трэніроўцы таксама лепш спаталяць чыстай вадой пакаёвай тэмпературы.
Каб не нашкодзіць сардэчна-сасудзістай сістэме, ідэальная трэніроўка пасля вечарынкі павінна быць нізкаінтэнсіўнай — на пульсе 60—70% ад формулы «220 мінус узрост». Так, частата сардэчных скарачэнняў для пасляалкагольнай трэніроўкі чалавека 30-ці гадоў павінна скласці 114—133 удары за хвіліну.
Хоць алкаголь змяшчае вялікую колькасць калорый, выкарыстаць іх для выпрацоўкі энергіі не атрымаецца. Трэба сачыць за рацыёнам і не забываць есцi як падчас ужывання спіртнога, так і пасля трэніроўкі.
Акрамя таго, алкаголь ускладняе засваяльнасць карысных рэчываў з ежы. Каб падтрымліваць дастатковы ўзровень энергіі, забяспечце сябе ежай, багатай на вугляводы, бялкі і тлушчы. Рэкамендуецца паесці праз 30—45 хвілін пасля заняткаў спортам і не забыцца пра шклянку вады.
Важна памятаць, што алкаголь — гэта дэпрэсант, ён можа ўплываць на працу мноства сiстэм. Звычайна пасля ўжывання спіртнога змяншаецца цягавітасць, сіла і хуткасць рэакцыі, што можа прывесці да траўмаў падчас заняткаў спортам. Таму, вырашаючы пайсці ў залу пасля бурнай ночы, неабходна прыслухацца да свайго арганізма ці застацца дома, каб папоўніць свае сілы і не нашкодзіць здароўю.
«Наша Нiва» — бастыён беларушчыны
ПАДТРЫМАЦЬПамёр дзед Колі Лукашэнкі — былы вязень ГУЛАГа, асуджаны за дапамогу «бандэраўцам»3
Каментары