Інфармацыя пра вагнераўцаў на беларуска-літоўскай мяжы можа быць укідам — «Беларускі Гаюн»
Учора ўвечары ў беларускія медыя, у тым ліку ў «Нашу Ніву», прыйшла інфармацыя і відэа ад людзей, якія нібыта «ехалі да бацькоў жонкі ў вёску і знялі групу з чатырох мужчын, якія нешта выгружалі». Але, хутчэй за ўсё, гэта ўкід.
На відэа паказаны чорны Volkswagen Touareg, на якім можна разгледзець нумары, падобныя да нумарных знакаў так званай «ЛНР», а каля машыны група мужчын у вайсковай форме выгружае нейкія скрыні, якія могуць быць кейсамі для квадракоптараў.
Выглядае гэта досыць праўдападобна, але ёсць шэраг фактаў, якія паказваюць на тое, што гэта чарговы фэйк, сцвярджае маніторынгавая група «Беларускі Гаюн».
Заяўлялася, што відэа знята каля в. Галавенчыцы (Гродзенская вобл). На ім відаць, што неба яснае, амаль няма аблокаў. Аднак за 20 км адтуль знаходзяцца літоўскія Друскенікі (Друскінінкай), дзе на працягу ўсяго дня назіралася больш пахмурнае надвор'е.
Па-другое, карыстальнік, які рассылаў гэта відэа беларускім медыя, зарэгістраваўся ў тэлеграме ўсяго месяц таму і ўжо мяняў нікнэйм, але галоўнае, што многім медыя ад яго прыйшло ўсяго два паведамленні. І ў першым ён прапаноўваў апублікаваць відэа з украінскіх каналаў, дзе нібыта знятыя вагнераўцы ў в. Цэль.
Абодва відэа ад гэтага карыстальніка маюць шэраг супадзенняў, хоць знятыя, па яго словах, у зусім розных месцах. На двух відэа прысутнічае група з траіх мужчын і ёсць Volkswagen Touareg чорнага колеру.
Лукашэнка: Пасля абвастрэння становішча на мяжы ў ваенкаматы звярнуліся тысячы добраахвотнікаў12
Каментары