Кошт некаторых паштовых адпраўленняў вырасце. Таксама ўводзіцца тарыф на выплату пенсій і іншых паслуг
Міністэрства антыманапольнага рэгулявання і гандлю прыняло рашэнне павысіць тарыфы на некаторыя паштовыя паслугі. Гэта прадугледжана пастановай №48 ад 17 жніўня, якая афіцыйна апублікаваная на Нацыянальным прававым інтэрнэт-партале.
Рашэнне ўступіць у сілу 1 верасня, а значыць з гэтага часу зменяцца і тарыфы, піша «Спутнік».
Так, 1 верасня падаражэе перасылка паштовых картак, лістоў і бандэроляў масай да 20 грамаў для фізічных асоб. Калі цяпер гэтая паслуга каштуе 62 капейкі, то з верасня ўжо будзе на 8 капеек даражэй, гэта значыць 70 капеек. За кожныя наступныя 20 грамаў адпраўленняў трэба будзе даплачваць 6 капеек, цяпер даплата складае 5 капеек.
Што тычыцца юрыдычных асоб і індывідуальных прадпрымальнікаў, то для іх перасылка картак, лістоў і бандэроляў масай да 20 грамаў падаражэе на 6 капеек да 58 капеек, а за кожныя дадатковыя 20 грамаў даплачваць прыйдзецца 5 капеек.
Таксама дакументам перагледжаны тарыф на выплату пенсій, дапамог, кампенсацый і ажыццяўленне іншых выплат аператарамі паштовай сувязі.
У сталіцы ён складзе 0,7% ад сумы выплаты, цяпер гэта 0,9%, а ў абласных і раённых цэнтрах, а таксама гарадах абласнога падпарадкавання — 0,9% ад сумы (цяпер 1,05% або 1,34%).
У астатніх населеных пунктах гэты тарыф складзе 2,34% ад сумы выплаты.
Каментары