ІТ-група на 1000 чалавек у Мінску, што прывозіла Тыля Швайгера, пайшла ў прастой і закрыла доступ у офіс
ІТ-група Blockchain Sports Ecosystem, якая ўжо 2—3 месяцы не выплачвае супрацоўнікам зарплату, з 25 сакавіка пайшла ў вымушаны прастой. Пакуль на месяц. Пра гэта кампанія паведаміла супрацоўнікам у лісце, піша Devby.io.
Увядзенне прастою для ўсіх супрацоўнікаў кампанія назвала няпростым, але неабходным рашэннем.
«Мы вымушаны ўвесці прастой у сувязі з неабходнасцю стабілізацыі сітуацыі па арэндзе памяшканняў і фінансавых пытаннях, уключаючы хуткую выплату запазычанасці па заробках», — адзначаецца ў лісце.
Да канца гэтага тыдня ўсе супрацоўнікі ІТ-групы павінны прыйсці ў офіс, каб падпісаць неабходныя дакументы. На час прастою супрацоўнікам будуць выплачваць 2/3 акладу.
Кампанія спадзяецца, што прастой працягнецца каля месяца.
«Але мы прыкладаем усе намаганні, каб як мага хутчэй вырашыць сітуацыю і аднавіць працу ў поўным аб’ёме. Каманда кіраўнікоў знаходзіцца ў Бялградзе. Мы актыўна працягваем перамовы з нашымі інвестарамі і маем надзею, што ў бліжэйшы час зможам вярнуцца да вас з пазітыўнымі навінамі», — паведаміла кампанія ў лісце.
Па словах аднаго з супрацоўнікаў ІТ-групы, Blockchain Sports Ecosystem увяла прастой, каб запазычанасць па заробку перад супрацоўнікамі не расла так хутка. Але нават агучаную ў лісце частку зарплаты кампанія не будзе выплачваць у перыяд прастою.
— Мне выплачвалі аклад і прэмію. 2/3 акладу, пра якія гаворыцца ў лісце, — гэта мінус 60% усяго заробку ў маім выпадку. Але кампанія не плаціць зарплату ўжо тры месяцы, таму і 2/3 акладу таксама ніхто не будзе выплачваць. Няма грошай, — патлумачыў супрацоўнік.
Ён сцвярджае, што зараз з усёй групы кампаній працягваюць працаваць толькі спецыялісты, канкрэтна звязаныя з пошукам інвестараў. Усім астатнім нават закрылі доступ у офіс.
— У свой офіс (у мінскім БЦ «Футурыс») мы не трапілі, сістэма FACE ID адключаная. Частка паверхаў працуе, частка не. Адкрылі толькі доступ на некаторыя паверхі, каб забраць рэчы. І быў адкрыты паверх, дзе знаходзіцца аддзел кадраў.
На дадзены момант частка супрацоўнікаў шукае новую працу, хтосьці ўжо напісаў заяву на звальненне, а некаторыя маюць паралельныя праекты і пакуль не плануюць сыходзіць.
— Некаторыя вераць, што такая буйная кампанія не можа разваліцца. Але надзеі ўсё менш. Цікава, што ў красавіку адбудзецца чэмпіянат па дрыфце, і Blockchain Sports Ecosystem выступае там як партнёр. Узнікае пытанне: як гэта ўсё фінансуецца?
Кантэкст
ІТ-група Blockchain Sports Ecosystem аб’ядноўвае некалькі каманд/кампаній/юрасоб, у тым ліку рэзідэнта ПВТ X-Labs Inc. У Беларусі яна вядомая каля паўтара года.
Штат налічвае як мінімум некалькі соцень чалавек. Супрацоўнікі называлі лічбы ад 800 да 1000 чалавек, а з улікам расійскага офіса — нават больш; на старонцы Blockchain Sports у LinkedIn пазначаны дыяпазон ад 1 тысячы да 5 тысяч чалавек.
Судзячы па сайце, ІТ-група мае штаб-кватэру ў Дубаі і тры асноўныя дамены — мотаспорт, дрыфт, футбол. У лістападзе 2024 года яна прывозіла ў Беларусь акцёра Ціля Швайгера.
З пачатку гэтага года ў Blockchain Sports Ecosystem узніклі праблемы з выплатай зарплат. Па словах супрацоўнікаў, гэта звязана з сыходам асноўнага інвестара. З-за адсутнасці грошай людзей нават не могуць звольніць: іх няма чым разлічыць.
Цяпер чытаюць
«Бульба» з Оршы пайшоў ваяваць за Расію — цяпер сястра шукае яго ці хаця б яго парэшткі2
Каментары