У Елгаве зробленая рэпліка аўтамабіля з папулярнага фільма 80-х «Міраж», знятага на Рыжскай кінастудыі. Легендарную інкасатарскую машыну зрабіў энтузіяст-аўтааматар Руслан Грыгаровіч, піша Delfi.lv.
Хоць дзеянне фільма 1983 года адбывалася нібыта ў ЗША, яго здымалі ў Латвійскай ССР, таму «амерыканскім» банкаўскім інкасатарскім аўтамабілем стаў уседарожнік таго часу «Лада Ніва».
Рэпліку ацанілі акцёры Марціньш Вілсаньш і Мірдза Марцінсоне, якія выканалі галоўныя ролі ў фільме. Яны прызналі, што копія аказалася нават якаснейшай, чым арыгінал з фільма.
Цікава, што арыгінальныя эскізы «кіношнай» «Лады Нівы» не захаваліся, таму елгавец Руслан Грыгаровіч узнаўляў аўтамабіль па кадрах з фільма. Напрыклад, у фільме ні разу не адкрываўся сейф для інкасацыі, таму яго ўнутраную планіроўку Руслану прыйшлося ствараць самому.
Па дарогах агульнага карыстання на гэтым аўтамабілі ездзіць не дазволяць, бо яго не змогуць зарэгістраваць з-за кратаў на вокнах і іншых элементаў пераабсталявання.
Фільм «Міраж» быў зняты ў 1983 годзе знакамітым латвійскім рэжысёрам Алаізам Брэнчам, які, напрыклад, зняў адзін з галоўных савецкіх хітоў — «Доўгую дарогу ў дзюнах».
«Міраж» — гэта трохсерыйная адаптацыя дэтэктыўнай аповесці Джэймса Хэдлі Чэйза «Увесь свет у кішэні».
Згодна з сюжэтам, у пошуках грошай Джыні, у якой звёў рахункі з жыццём бацька і пасля яго смерці немагчыма атрымаць страхоўку, яе сябра Эл і прафесійны крымінальнік Фрэнк (яго сыграў яшчэ адзін знакаміты балтыйскі акцёр Рэгімантас Адамайціс) выкрадаюць інкасатарскі аўтамабіль з трыма мільёнамі даляраў і хаваюцца ад паліцыі ў гарах.
У канцы фільма Джыні і Эл, каб не трапіць у рукі паліцыі, кідаюцца, узяўшыся за рукі, са скалы.
Цяпер чытаюць
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім14
Каментары