«За 7 гадоў заробак вырас амаль удвая». Колькі зарабляюць беларускія кіроўцы ў Еўропе
Дзясяткі тысяч беларусаў працуюць кіроўцамі грузавікоў у Польшчы, Літве і іншых краінах ЕС. «Наша Ніва» пацікавілася, колькі яны рэальна зарабляюць.
Колькі выходзіць за суткі?
Кірыла сем гадоў працуе кіроўцам-дальнабойшчыкам у польскай фірме. Мужчына кажа, што за гэты час ягоны заробак вырас амаль удвая. Цяпер за суткі ён атрымлівае каля 100 еўра.
«Калі пачынаў у 2017 годзе, сутачныя складалі 50 еўра, пасля — 55. Набраўшыся досведу, я пайшоў на фірму, дзе плацілі ўжо па 60», — згадвае мужчына.
Асабліва адчувальны рост зарплаты ў яго быў апошнія 2-3 гады. Год таму Кірыла зноў перайшоў у іншую фірму. Кажа, што цяпер за суткі працы атрымлівае 420 злотых (каля 105 еўра па бягучым курсе).
«Але аплачваюць толькі працоўныя дні. Калі «круціш» перапынкі па 24 і 45 гадзін, зарплату не налічваюць. Таму з улікам выходных, якія ўсё адно бавіш у кабіне, выходзіць недзе 350 злотых (каля 87 еўра) за суткі знаходжання на працы».
Кірыла звычайна праводзіць у рэйсе па два месяцы, потым на 2-3 тыдні едзе ў Беларусь. Мужчына адзначае, што цяпер аказаўся ў выйгрышы праз тое, што злоты за апошні час умацаваўся адносна даляра і еўра.
«Тры месяцы таму еўра быў па 4,4 злотага, цяпер апусціўся да 4. Таму ў валютным вымярэнні заробак падрос амаль на 10%», — кажа суразмоўца.
«На фірме заўжды знойдуць, за што аштрафаваць кіроўцу»
Міхаіл таксама працуе кіроўцам у польскай кампаніі і выконвае рэйсы толькі па ЕС.
«Аплата пасуткавая, таму няма розніцы, ты адпачываеш 1-2 сутак або едзеш, бо па факце ўсё адно знаходзішся на працы. Стаўка 80 еўра за суткі, але з улікам таго, што ў нашай кампаніі заўжды знойдуць, за што аштрафаваць кіроўцу, па факце выходзіць 75».
Мужчына працуе кадэнцыямі па 2-3 месяцы, потым на месяц едзе дамоў.
«Атрымліваецца, што за месяц зарабляеш 2200-2300 еўра, але калі месяц сядзіш дома, то зарплату не налічваюць, таму па маіх падліках з улікам часу, які праводзіш дома, у сярэднім выходзіць каля 1600 еўра ў месяц.
Скандынаўскі кірунак
Крыху больш зарабляе Павел, які таксама працуе ў польскай фірме і выконвае рэйсы ў скандынаўскія краіны.
«У мяне сутачная стаўка складае 90 еўра, бо скандынаўскі кірунак лічыцца больш складаным. Мае калегі, якія ездзяць па Заходняй Еўропе, атрымліваюць па 75 еўра на тэнтаванах фурах і па 80 на лядоўнях».
На цыстэрне па Германіі
Больш за ўсіх суразмоўцаў зарабляе Валер, які атрымаў польскае грамадзянства і працуе кіроўцам фуры з цыстэрнай у Германіі.
«Месячная зарплата складае 3000 еўра, рэйсы выконваю толькі па тэрыторыі Германіі. Аплата стабільная. Тыя самыя грошы за месяц я атрымліваю як у той месяц, калі кожны дзень на працы, так і за той, калі пасля кадэнцыі еду на два-тры тыдні дадому».
Не толькі на фурах
Мужчына, які працуе ў польскай фірме кіроўцам буса катэгорыі С, за суткі працы атрымлівае 65 еўра.
«Раней працаваў на бусе да 3,5 тоны, там аплата была таксама пасуткавая, але больш за 45-50 еўра за В катэгорыю ніхто не плаціць, таму паралельна вучыўся на код 95 (курсы для кіроўцаў аўто катэгорыі С, С+Е) і шукаў працу на грузавік пад катэгорыю С», — згадвае Андрэй.
Мужчына, апроч вышэйшай стаўкі, атрымаў больш лагодны рэжым працы, чым быў на легкатанажніку.
«На бусах да 3,5 тоны можна працаваць без электроннага тахографа, дастаткова ўручную весці тахабук. Яны пастаянна перапісваюцца, падганяюцца, каб было больш працоўнага часу. У дадатак на малых грузавіках няма забароны руху па нядзелях. Таму гэта пякельная праца з невысокай аплатай», — лічыць Андрэй.
Суразмоўца, які цяпер працуе на бусе пад грузавую катэгорыю С, кажа, што з улікам стаўкі 65 еўра ў суткі вучыцца на катэгорыю Е і пераходзіць на фуру ён не збіраецца.
«Розніца з аплатай для фуршчыкаў каля 10-15 еўра, але працаваць на бусе, хоць і вялікім, значна прасцей, чым на фуры, таму мяне туды не цягне», — тлумачыць мужчына.
Чытайце таксама:
Мінімальны заробак у Літве цяпер 708 еўра. У Беларусі таксама падрос — да 152 еўра
На Гомельшчыне знайшлі новае радовішча нафты
Каментары