Блогерку з дзіцём не пусцілі ў рэстаран «на мінскіх Патрыках». Чакайце, дзе?
Маладая тыктокерка размясціла відэа пра тое, як у мінскім рэстаране ёй з сынам адмовілі ў абслугоўванні. Карыстальнікаў здзівіла назва вуліцы, на якой усё адбылося.
Тыктокерка oh_valeriee1 апублікавала ролік пра спробу наведаць рэстаран на мінскай вуліцы Карла Маркса. Гаворка ішла пра Amo — новы рэстаран міжземнаморскай кухні.
Пратэставаць яго, аднак, дзяўчына не здолела, бо з дзецьмі да шасці гадоў уваход у Amo забаронены. Так што адзначыць яна змагла толькі прыгожы інтэр’ер, тэрасу і нечаканую для яе палітыку рэстарана, пра якую прапанавала паразважаць у каментарах.
Відэа сабрала 135 тысяч праглядаў.
Карыстальнікаў уразіла не толькі сама сітуацыя, але і тое, дзе ўсё адбылося: паводле аўтаркі відэа, рэстаран адкрыўся «на мінскіх Патрыках». У каментарах яны пыталіся, дзе гэтыя таямнічыя «мінскія Патрыкі», прасілі пакінуць мінскім вуліцам свае ўласныя назвы і цікавіліся, чаму менавіта Патрыкі, а не адразу мінская Ніца ці Манака.
Сама дзяўчына патлумачыла ў каментарах, што, на яе думку, вуліца Карла Маркса асацыюецца з маскоўскімі Патрыяршымі прудамі «з-за вайбу». А ў іншым роліку адказала хейтарам — маўляў, «мінскімі Патрыкамі» вуліцу Карла Маркса ўжо даўно называюць «у вузкіх і не вельмі колах». Яшчэ адно тлумачэнне ад аўтаркі — што гэта ўсё быў толькі сарказм.
Што да гісторыі з палітыкай рэстарана, шмат хто з каментатараў падтрымаў ідэю забараніць уваход з маленькімі дзецьмі. Людзі пісалі, што сучасныя бацькі не прывучаюць дзяцей да спакойных паводзінаў і таму малыя могуць перашкаджаць іншым гасцям, дый бацькам часам трэба адпачнуць ад дзяцей. Але былі і тыя карыстальнікі, хто палічыў такую палітыку непрымальнай і вырашыў тады ўвогуле не наведваць гэты рэстаран.
«Наша Нiва» — бастыён беларушчыны
ПАДТРЫМАЦЬ
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі15
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1515
Каментары