Чатыры беларускія кампаніі трапілі ў топ-50 найбуйнейшых замежных прадпрыемстваў у Расіі
Часопіс Forbes апублікаваў рэйтынг 50 найбуйнейшых замежных кампаній у Расіі па выніках працы за 2023 год. У яго трапілі чатыры кампаніі з Беларусі. На гэта звярнула ўвагу «Экономическая газета».
Аналітыкі з Forbes звяртаюць увагу, што на змену заходняму бізнэсу, які пайшоў з Расіі, прыходзіць кітайскі. Акрамя таго, пашыраецца прысутнасць там беларускага бізнэсу.
Калі ў 2022 годзе ў рэйтынг не трапіла ніводная кампанія з Беларусі, то праз год іх было дзве — «БелАЗ Холдынг» (38 месца ў рэйтынгу) і група Santa (39 месца).
У новым рэйтынгу ўжо чатыры беларускія кампаніі. Да «БелАЗ Холдынг» (28 месца і 88,3 млрд расійскіх рублёў выручкі) і групы Santa (29 месца і 83,9 млрд расійскіх рублёў) далучыліся Беларускі металургічны завод (26 месца і 94,3 млрд расійскіх рублёў) і МАЗ (48 месца і 48,5 млрд расійскіх рублёў).
Узначаліў рэйтынг вытворца легкавых аўтамабіляў Chery з Кітая, прадаўшы на расійскім рынку больш за 220 тыс. аўтамабіляў (і ў 4 разы павялічыўшы суму выручкі — да 590 млрд расійскіх рублёў). На другім месцы — японскі вытворца тытунёвых вырабаў JT Group (выручка 480 млрд расійскіх рублёў). На трэцім — амерыканская тытунёвая кампанія Philip Morris International (440,2 млрд расійскіх рублёў).
У рэйтынг увайшлі 50 найбуйнейшых замежных кампаній, якія працягваюць працаваць у Расіі і па стане на 23 жніўня 2024 года больш чым на 50% належалі замежным карпарацыям або фізічным асобам. Яны ранжыраваныя па сукупнай выручцы, атрыманай у 2023 годзе, у якую ўключаныя даныя асноўных расійскіх падраздзяленняў замежнай кампаніі.
Лукашэнкаўцы ўпершыню за доўгі час паказалі Віктара Бабарыку27
Каментары