Губарэвіч патлумачыў, чаму рашыў удзельнічаць у прэзідэнцкіх выбарах
Кіраўнік ліквідаванага ўладамі Руху «За свабоду» і эксперт па рэгіянальным развіцці Народнага антыкрызіснага кіравання Юрась Губарэвіч паведаміў, што збіраецца ўдзельнічаць у новых прэзідэнцкіх выбарах. Ён ужо даслаў у ЦВК заяву, спіс ініцыятыўнай групы і іншыя дакументы, неабходныя для рэгістрацыі ў якасці кандыдата. Ён распавёў «Нашай Ніве», дзеля чаго робіць гэта, калі іншыя прадстаўнікі апазіцыі заклікаюць ці байкатаваць выбары, ці галасаваць «супраць усіх».
Палітык кажа, што ўдзел у выбарах — гэта найперш яго права як грамадзяніна Беларусі:
«Я маю пашпарт грамадзяніна Рэспублікі Беларусь. Усе ўзроставыя цэнзы мяне не тычацца. Маю ўсе падставы дзеля таго, каб мая заяўка на ўдзел была задаволеная».
Пасля зменаў у Канстытуцыю кандыдат у прэзідэнты павінен пражыць не менш за 20 гадоў у Беларусі непасрэдна перад выбарамі і не мець ДНЖ іншай краіны. Юрась Губарэвіч кажа, што яго гэтыя абмежаванні не тычацца, ён — проста «часова не ў Беларусі».
«На дадзены момант я не маю ніякіх відаў на жыхарства. Мае дакументы ў працэсе разгляду, але рашэння няма», — сцвярджае палітык. «Што тычыцца моманту пра пражыванне за мяжой, ізноў такі: закон не акрэслівае канкрэтную колькасць дзён ці колькасць год, якія трэба пражыць за мяжой, каб гэтае абмежаванне пачало дзейнічаць. Тут такі юрыдычны нюанс».
Юрась Губарэвіч ужо вылучаўся на прэзідэнцкія выбары ў 2020 годзе, але зняў сваю кандыдатуру пасля 15 сутак за «несанкцыянаванае пікетаванне». З таго моманту рэпрэсіі супраць любога «іншадумства» толькі ўзмацніліся, усе палітычныя гульцы, якія не выехалі за мяжу, знаходзяцца за кратамі — які тады сэнс удзельнічаць у выбарах у такіх умовах?
«Адна справа — словы, і іншая — збіранне доказаў і фактаў. Мы, канечне, можам ацэньваць гэтыя выбары як недэмакратычныя, і, хутчэй за ўсё, з велізарнай доляй верагоднасці, мая заяўка не будзе задаволеная, але гэта крок, які дадаткова пацвердзіць, што ў сённяшніх умовах казаць пра роўныя магчымасці для ўсіх кандыдатаў не прыходзіцца.
Тым больш для тых, хто прадстаўляе адрозны ад афіцыйнага погляды. Рэжым заўсёды можа сказаць: вы нават не спрабавалі, усе, хто хацеў заявіцца, заявіліся і ўзялі ўдзел у выбарах, мы нікога не абмяжоўвалі. Мая задача — паказаць, ці так гэта насамрэч».
У ініцыятыўную групу палітыка ўвайшлі людзі, якія былі ў ёй у 2020 годзе. Пры станоўчым выніку Губарэвіч плануе адправіць заносіць сабраныя подпісы ў ЦВК сваю давераную асобу, як тое робіць Лукашэнка.
«Тут трэба, каб таксама быў роўны падыход да ўсіх кандыдатаў — я штосьці не памятаю, каб Лукашэнка насіў сам свае дакументы ў ЦВК».
Што вядома пра беларуса Віктара Павелку, якога ў Польшчы падазраюць у арганізацыі нападаў на расійскіх апазіцыянераў1
Каментары
Апублікуйце спіс ініцыятыўнай групы Губарэвіча. І хто яго давераная асоба, якая панясе сабраныя подпісы ў ЦВК?
А то ЦВК (а значыць аўтаматычна і КДБ) ведаюць, хто ў спісе Губарэвіча, а народ не ведае.
Не ўсё напісалі. На сайце КР пазначана, што ён яшчэ Намеснік прадстаўніка Аб'яднанага Пераходнага Кабінета, адказны за фармаванне кадравага рэзерву для новай Беларусі.
Уваходзіць у фракцыю Каардынацыйнай Рады - кааліцыя Каманда Латушкі і Рух «За Свабоду».