Выбары ў Румыніі: у першым туры лідзіруе кандыдат, які крытыкаваў NATO і дапамогу Украіне
На другім месцы знаходзіцца дзейны прэм'ер-міністр, лідар Сацыялістычнай партыі (PSD) Марчэл Чалаку, які лічыўся фаварытам выбарчай гонкі.
Па выніках першага тура прэзідэнцкіх выбараў у Румыніі нечакана лідзіруе незалежны кандыдат Кэлын Джэарджэску, які раней уваходзіў ва ўльтраправы «Альянс за аб'яднанне румынаў» (AUR) і выказваўся з крытыкай ЕС і NATO. На другім месцы знаходзіцца дзейны прэм'ер-міністр, лідар Сацыялістычнай партыі (PSD) Марчэл Чалаку, які лічыўся фаварытам выбарчай гонкі, піша Бі-бі-сі.
Пасля падліку больш за 99% галасоў Джэарджэску набірае 22,8%, Чалаку — 19,3%. Абодва кандыдаты пройдуць у другі тур, які адбудзецца 8 снежня.
Першапачаткова галоўным канкурэнтам Чалаку лічыўся лідар AUR Джорджэ Сіміон, які, паводле папярэдніх даных, заняў чацвёртае месца.
Афіцыйныя вынікі не супадаюць з данымі экзітполаў, паводле якіх на другое месца выходзіла прадстаўніца Ліберальна-кансерватыўнай партыі Элена Ласконі. Урэшце яна заняла трэцяе месца.
Джэарджэску апытанні прадказвалі 16-17% і максімум трэцяе месца.
Канчатковыя вынікі будуць абвешчаны ў панядзелак пасля падліку галасоў у Бухарэсце і на ўчастках за мяжой.
У выбарах удзельнічала 13 кандыдатаў. Для перамогі ў першым туры неабходна было набраць больш за 50% галасоў.
Чалаку заяўляў, што ў яго ёсць «пэўны план па стварэнні больш развітай Румыніі, якая не пакіне нікога без увагі, унутраны план, заснаваны на эканамічным росце і інвестыцыях, і план па ўмацаванні ўплыву і аўтарытэту Румыніі за мяжой».
Ён таксама назваў «палітычнымі экстрэмістамі» палітыкаў, якія выступаюць супраць членства краіны ў ЕС і НАТО, і заявіў, што яны павінны быць «палітычна ізаляваныя».
Кэлын Джэарджэску быў аб'ектам крытыкі за прарасійскія выказванні, а таксама за сваю пазіцыю адносна адносін Румыніі з НАТО і ЕС.
У 2021 годзе ён заяўляў, што Паўночнаатлантычны альянс не будзе абараняць ніводнага са сваіх членаў у выпадку нападу Расіі, нагадвае Reuters.
Джэарджэску таксама крытыкаваў ваенную дапамогу Украіне з боку ЗША.
Сваю выбарную кампанію 62-гадовы палітык пераважна вёў у тыктоку, дзе атрымаў папулярнасць.
«Пасля 34 гадоў блукання румынскі народ упершыню пераможа на гэтых выбарах. Мая партыя — румынскі народ», — заявіў Джэарджэску.
Лідар «Альянса за аб'яднанне румынаў» Джорджэ Сіміон, які лічыўся асноўным канкурэнтам Чалаку, падчас выбарчай кампаніі не раз згадваў вайну ва Украіне, з якой мяжуе Румынія.
У 2022 годзе і пазней ён неаднаразова называў Уладзіміра Пуціна ваенным злачынцам, але пры гэтым выступаў супраць паставак зброі Украіне. Яго таксама абвінавачвалі ў сувязях з расійскімі спецслужбамі, на што Сіміон адказваў, што ён узначальвае «самую русафобскую партыю Румыніі».
Прэзідэнт Румыніі — кіраўнік дзяржавы і галоўнакамандуючы ўзброенымі сіламі краіны. Ён абіраецца на 5 гадоў і валодае значнымі паўнамоцтвамі ў пытаннях нацыянальнай бяспекі і знешняй палітыкі.
Каментары