Стала вядома, што за беларус арганізоўваў напад на расійскага апазіцыянера Волкава ў Вільні
Расійскае выданне «Медиазона» вывучыла архіў перапіскі паміж расійскім мільянерам Леанідам Неўзліным і юрыстам Анатолем Бліновым, які абвінавачваецца ў арганізацыі нападу ў Вільні на паплечніка Аляксея Навальнага Леаніда Волкава. Сярод іншага з апублікаванага аналізу перапіскі стала вядома, што за беларус замяшаны ў гэтую справу.
Раней прэм'ер-міністр Польшчы Дональд Туск, заяўляючы пра затрыманне ў ягонай краіне падазраваных у нападзе на Волкава, адзначыў, што яны «звязаныя з коламі футбольных фанатаў ультрас», а таксама што затрыманы грамадзянін Беларусі, які іх наняў. Паводле звестак выдання The Insider, на гэтага беларуса выйшлі, вывучаючы сувязі затрыманага за напады ў Аргенціне.
Імя арыштаванага беларуса не называлася, але цяпер «Медиазона» высветліла, што яго завуць Віктар Павелка.
Віктару Павелку 36 гадоў. У 2022 годзе яго ўжо судзілі ў Польшчы па справе аб махлярстве і адмыванні грошай. Адной з 17 абвінавачаных тады стала вядомая ў Польшчы тэлевядучая Марцэліна Завадская, якую звязвалі з Павелкам рамантычныя стасункі.
Як расказвала польскае выданне Polityka, Павелка — сын афіцэра КДБ Беларусі, а ў Польшчы ён стварыў злачынную групу, якая прымушала людзей да махлярства. Сярод іх была і тэлевядучая Завадская.
У судзе адзін з падсудных сцвярджаў, што падручныя беларуса паставілі на яго машыну GPS-маячок, пасля чаго яго высачылі і паранілі нажом. Іншы падсудны, грамадзянін Украіны, характарызаваў Павелку як чалавека, які п'е і паводзіць сябе агрэсіўна, часта пагражаючы фізічнай расправай. Яшчэ адзін падсудны, былы баец ММА, які займаўся разам з Павелкам гульнявым бізнэсам, успамінаў, што той падсылаў да яго дадому рускамоўных вымагальнікаў, каб выбіць запазычанасць.
У выніку суд у Калішы прысудзіў Павелку да 3 гадоў і 8 месяцаў зняволення. Да таго часу асуджаны ўжо больш за два гады быў у СІЗА, а таму праз пэўны час апынуўся на волі.
У пракуратуры Польшчы «Медиазоне» паведамілі, што па справе аб нападах на расійскіх апазіцыянераў беларусу выстаўленыя тры абвінавачванні, сярод іх — арганізацыя нападу па палітычных матывах. Ён знаходзіцца пад арыштам.
Прозвішча Павелка аднойчы згадвае ў перапісцы Анатоль Бліноў.
«Ёсць навіна — ёсць кур'ер, які возіць залатыя манеты і грошы з Беларусі ў Швейцарыю і назад. Знаёмы майго нумізмата, — пісаў ён 1 снежня мінулага года. — Банкаўскі кур'ер — Павелка Уладзімір».
Пра каго менавіта тут ідзе гаворка, з перапіскі незразумела (не выключана, што Бліноў проста пераблытаў імя).
Арыштаваны Віктар Павелка, калі верыць лісту Блінова, супрацоўнічае са следствам і дае супраць яго паказанні.
Падазраваны ў арганізацыі нападу на паплечніка Навальнага атрымаў прытулак у Польшчы на падставе ліста ад «Хартыі 97»
Абвінавачаныя ў нападзе на Леаніда Волкава могуць выйсці пад заклад
Да арганізацыі нападу на Волкава датычны былы паліцыянт з Латвіі. Цяпер ён уцёк у Расію
Стала вядома, у чым падазраюць беларуса, затрыманага за напад на расійскага апазіцыянера Волкава
У Польшчы арыштавалі меркаванага арганізатара нападу на расійскага апазіцыянера Леаніда Волкава
Каментары