Стала вядома пра смерць 38-гадовага экс-палітвязня Алега Гнедчыка
У юнацтве Гнедчык быў актывістам «Маладога фронту», ён трапіў у калонію пасля Плошчы-2010.
Пра заўчасную смерць былога актывіста паведаміў колішні лідар «Альтэрнатывы» Алег Корбан, які цяпер знаходзіцца ў эміграцыі. Гнедчык быў палітвязнем пасля падзей 2010 года.
Алег Гнедчык нарадзіўся 22 лістапада 1986 года. Скончыў будаўнічую вучэльню, працаваў на будоўлях у Мінску і Маскве. У 2003-2005 гадах за палітычную актыўнасць як сябра «Маладога фронту» яго затрымлівалі і каралі адміністрацыйнымі арыштамі. У 2006 годзе адседзеў 12 сутак за ўдзел у намётавым лагеры.
Быў актыўным удзельнікам Плошчы-2010. Маладафронтаўца судзілі ў адной групе з кандыдатам у прэзідэнты Андрэем Саннікавым. Гнедчык атрымаў 3 гады зняволення.
Алег Гнедчык трапіў у калонію Шклова.
У лісце на волю Мікола Статкевіч пісаў: «Цяпер пачалася новая хваля ціску на «дзекабрыстаў» — спрабуюць прымусіць напісаць заявы пра памілаваньне і выступіць перад тэлекамерай. Больш за ўсё дастаецца Гнедчыку… — ён ужо пабываў у ШІЗА. Я хлопцам сказаў: «Можаце пісаць. Вам можна. Гэта мне нельга». Але яны не хочуць прызнаваць віну».
Гнедчык быў вызвалены па памілаванні 1 верасня 2011 года — без прызнання віны.
«Кажуць, што турма ламае чалавека. Але яна наадварот робіць яго мацней. Я стаў крыху мацней», — заявіў ён пасля вызвалення.
«У падзеях 2020 года ён не засвяціўся, трымаў дыстанцыю, заставаўся жыць у Мінску», — напісаў пра Гнедчыка Корбан.
Апошні раз ён быў «Укантакце» 30 красавіка 2025 года.
Цяпер чытаюць
«Стрэльба калі і стрэліць, то наўрад ці кулямётнай чаргой». Максім Знак ацаніў рэальнасць пагроз беларускай прапаганды пазбавіць грамадзянства палітэмігрантаў1212
Каментары
[Зрэдагавана]