Грэцыя абвясціла часовую забарону на прытулак для ўцекачоў з Афрыкі — замест гэтага будуць адразу адпраўляць у турму
Прэм'ер-міністр Грэцыі Кірыякас Міцатакіс пастанавіў, што ўцекачы з Паўночнай Афрыкі часова не будуць праходзіць працэдуру прадастаўлення прытулку. Іх плануюць адпраўляць у новую турму на Крыце, піша Bild.
Па даных грэчаскіх уладаў, з пачатку года больш за 10 000 нелегальных мігрантаў прыбылі на турыстычны востраў Крыт з Паўночнай Афрыкі праз Міжземнае мора. Гэта рост на 350% у параўнанні з мінулым годам. У апошнія дні штодня прыбывала каля 500 чалавек.
«Ва ўмовах рэзкага росту нелегальных прыбыццяў марскім шляхам з Паўночнай Афрыкі, асабліва з Лівіі на Крыт, мы прынялі цяжкае, але абсалютна неабходнае рашэнне часова прыпыніць разгляд заявак на прытулак для асоб, якія прыбываюць марскім шляхам з паўночнаафрыканскіх краін», — сказаў Міцатакіс.
Гэта азначае, што іх будуць лічыць нелегальнымі перасяленцамі і адпраўляць у турму. Паколькі на Крыце пакуль няма такой турмы для мігрантаў, зараз неабходна пабудаваць новую — і, па заяве ўладаў, пры неабходнасці нават дзве.
Большасць бежанцаў адплываюць з узбярэжжа Лівіі. Цяпер гэтая паўночнаафрыканская краіна знаходзіцца ў стане канфлікту: большая частка ўзбярэжжа кантралюецца лідарам паўстанцаў Халіфай Хафтарам, які падтрымлівае сувязі з Расіяй і маскоўскімі наймітамі. Меншая частка знаходзіцца пад кантролем афіцыйнага ўрада ў Трыпалі.
Міцатакіс, пры гэтым, прапануе дапамогу абодвум бакам: «Мы гатовыя цесна супрацоўнічаць з лівійскімі ўладамі, каб спыніць адпраўленні».
Але прэм'ер-міністр Грэцыі таксама падкрэслівае, што Грэцыя адна не справіцца з крызісам на Крыце:
«Нам таксама патрэбны агульны еўрапейскі адказ. Грэцыя застаецца прыхільнай справядлівай і эфектыўнай міграцыйнай палітыцы, уключаючы легальныя шляхі міграцыі — але бягучая сітуацыя патрабуе неадкладных дзеянняў. І гэта адказнасць не толькі Грэцыі, але і ўсёй Еўропы».
Цяпер чытаюць
Рэдкі выпадак: памілаваны беларускі палітвязень пайшоў на вайну супраць Украіны10
Рэдкі выпадак: памілаваны беларускі палітвязень пайшоў на вайну супраць Украіны
«Стрэльба калі і стрэліць, то наўрад ці кулямётнай чаргой». Максім Знак ацаніў рэальнасць пагроз беларускай прапаганды пазбавіць грамадзянства палітэмігрантаў1212
Каментары