У Беларусі сёлета няма чарніц. Калі летась нарыхтоўшчыкі прынялі дзясяткі тон ягад, то сёлета — нічога
Вясновыя замаразкі і працяглыя дажджы не пакінулі шанцаў лясной ягадзе.
Пра дэфіцыт чарніц гэтым летам піша выданне «Точка».
Як расказаў блогер-ягадашукальнік Аляксандр Свірко, вядомы ў TikTok пад нікам «Ягадны Барон», гэтае лета стала адным з самых складаных па ўраджаю чарніц. Збор пачаўся пазней, чым звычайна, і працягнецца зусім нядоўга.
Мужчына збірае ягады ўжо 19-ы год, займаецца гэтым з дзяцінства і адзначае, што прагнозы на сёлетняе лета несуцяшальныя.
«Чарніцы добра цвілі, але моцна пацярпелі ад замаразкаў, што цягнуліся тыдзень у маі. У выніку пра чарнічныя «дываны», якія былі некалькі гадоў таму, можна толькі марыць», — канстатуе ён.
Праз наступныя частыя дажджы ягады атрымаліся дробныя і вадзяністыя — «лопаюцца ў руках».
«Збіраць чарніцы даводзіцца ў зацішных месцах, на аддаленых палянах — літаральна па ягадцы», — скардзіцца Свірко.
Блогер таксама адзначае, што ў гэтым годзе не варта разлічваць і на доўгі сезон. Збор чарніц пачаўся пазней і працягнецца нядоўга. Калі раней іх можна было знаходзіць да верасня, то цяпер ужо ў жніўні лес можа апусцець.
«Максімум тыдзень-два — і чарніцы адыдуць. Зялёныя ягадкі трапляюцца — на іх застаецца невялікая надзея», — тлумачыць Аляксандр.
Ягаднік скардзіцца і на маліны — нават у сваіх «фірмовых» месцах знаходзіць толькі дробныя і чарвівыя.
Што кажуць кааператары
Пра дэфіцыт паведамляюць і нарыхтоўчыя пункты. Як паведаміў начальнік упраўлення прамысловасці, нарыхтовак і знешнеэканамічнай дзейнасці Магілёўскага аблспажыўсаюза Арцём Прыжкоў,
сёлета насельніцтва чарніц пакуль увогуле не здавала.
Між тым у 2024 годзе да сярэдзіны ліпеня нарыхтоўшчыкі ўжо прынялі 32,5 тоны гэтых ягад.
Прычыны, паводле Прыжкова, тыя ж самыя: вясновыя замаразкі і працяглыя дажджы.
Цяпер чытаюць
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім17
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім
Бабарыка і Калеснікава пагаварылі з Інгай Ругінене і заклікалі Літву «далучыцца да дыпламатычных намаганняў ЗША» і «не прапусціць акно магчымасцей»3636
Каментары
В этом сезоне наша страна осталась не только без картошки, но даже без яблок.