Беларускія дальнабойшчыкі ўсё часцей выбіраюць для працы Германію замест Польшчы і Літвы. Расказваюць пра заробкі

Ад 70 еўра ў суткі

Найбольш папулярнымі краінамі сярод беларускіх дальнабойшчыкаў па-ранейшаму застаюцца Польшча і Літва, але многія кіроўцы імкнуцца ўладкавацца ў Германію.

Найменшыя заробкі ў кіроўцаў, якія працуюць у польскіх фірмах на бусах пад катэгорыю В (да 3,5 тоны). Сутачныя ў іх, як правіла, 300—320 злотых (каля 70—75 еўра).

На бусах пад катэгорыю С і невялікіх грузавіках плацяць ужо ад 80 еўра за суткі ў рэйсе.

Чалавек, які працуе ў фірме, што мае парк рэфрыжэратараў і, адпаведна, спецыялізуецца на перавозцы тавараў, якія хутка псуюцца, атрымлівае 80 еўра за суткі працы на бусе пад В катэгорыю.

Павялічыць

Па яго словах, кіроўцам, якія маюць грузавую катэгорыю і працуюць на малатанажных грузавіках з халадзільнікам, плацяць па 100 еўра за суткі.

На фурах — больш

Пачатковы тарыф за суткі працы на тэнтавых фурах (катэгорыя С+Е) складае 85 еўра, калі размова ідзе пра польскія або літоўскія фірмы.

Дальнабойшчыкі, якія ўжо маюць досвед працы па ЕС, еўрапейскія правы і грамадзянства адной з краін Еўрасаюза (у нашым выпадку часцей за ўсё Польшчы), намагаюцца шукаць працу ў краінах Заходняй Еўропы.

Суразмоўца, які нядаўна атрымаў польскі пашпарт, распавёў, што пры пошуку новай фірмы ўжо ў якасці грамадзяніна Польшчы яму прыходзілі больш выгадныя прапановы, чым было з дазволам на пастаяннае пражыванне (ПМЖ).

Па словах дальнабойшчыка, калі ў адной з транспартных кампаній даведаліся, што ў яго польскае грамадзянства, то прапанавалі два варыянты працы:

«Калі я хачу працаваць у іх польскай фірме, то мне прапанавалі 95 еўра за суткі, а паколькі я грамадзянін ЕС, то магу ўладкавацца ў іх нямецкую кампанію, і тады будзе ўжо 120 еўра за суткі працы. Выходныя ў рэйсе аплочваюцца па тым жа тарыфе, таму няма розніцы, еду я ці стаю на паўзе.

Пры гэтым замена кіроўцаў пасля кадэнцыі ўсё адно адбываецца на іх базе ў Польшчы», — кажа беларускі дальнабойшчык, які з польскім пашпартам працуе ў Германіі.

Польскі пашпарт і нямецкая мова павялічваюць заробак на 50%

Іншы суразмоўца, які таксама пасля атрымання польскіх дакументаў уладкаваўся кіроўцам фуры ў Германіі, кажа, што ў сярэднім мае за месяц каля 2900—3000 еўра на рукі. 

«Гэта менавіта сярэднемесячны паказчык з улікам адпачынкаў, а не так, як любяць казаць многія, што яны зарабляюць па 3000 еўра ў месяц, але не ўлічваюць, што пасля кадэнцыі сядзяць дома і не атрымліваюць за гэты перыяд нічога.

Па факце ў маіх калег, якія працуюць на польскіх фірмах кадэнцыямі па 6/3 або 8/4, сярэдняе на месяц будзе да 2000 еўра», — тлумачыць дальнабойшчык.

Мужчына выконвае рэйсы толькі па Германіі. Сярод нюансаў: для такой працы ад яго патрабуецца валоданне нямецкай мовай.

Павялічыць

Беларускія кіроўцы, якія фармальна лічацца за польскай фірмай, але дэ-факта працуюць у Германіі, атрымліваюць наступныя грошы:

105 еўра за суткі за працу на сярэднетанажніку па катэгорыі С і па 115 еўра, калі працуюць на С+Е.

«У нас звычайная пяцідзёнка з плюс-мінус 8‑гадзінным працоўным днём. Развозім прадукты па крамах буйной гандлёвай сеткі. Выходныя не аплачваюцца за выключэннем выпадкаў, калі даводзіцца падпрацоўваць па суботах. Пражываем у катэджы, за пражыванне вылічваюць па 200 еўра за месяц», — кажа кіроўца з Беларусі.

Работа з нямецкім ДНЖ

Яшчэ адзін суразмоўца, які раней таксама працаваў у Германіі на польскай фірме, кажа, што з часам вырашыў зрабіць сабе нямецкія дакументы, каб уладкавацца наўпрост у Германіі і зарабляць больш.

«Спачатку давялося рабіць працоўную нямецкую візу, для атрымання якой патрабавалася валоданне мовай. Усё рабілася праз адваката, таму давялося крыху інвеставаць у дакументы. Атрымаўшы з другой спробы працоўную нямецкую візу, уладкаваўся там на працу і падаўся на часовы ДНЖ».

Са слоў мужчыны, так ягоны заробак вырас адразу на 20% у параўнанні з тым, што ён меў, калі працаваў у той жа Германіі, але з польскімі дакументамі і праз польскую фірму.

«У пераліку на суткі — маю каля 130 еўра. Таксама ёсць аплатныя бальнічны і адпачынак на месяц, чаго не было, калі працаваў на палякаў».

• 12
• 0
• 3
• 1
• 0
• 0
• 0
• 0