«Чакаем, што з намі будуць кансультавацца». Заходнія палітыкі — пра тайны мірны план ЗША
Еўрапейскія палітыкі не хаваюць здзіўлення, што да выпрацоўкі мірнага плана ў Еўропе іх не запрасілі.
Любы план па спыненні вайны ва Украіне запатрабуе падтрымкі ўкраінцаў і еўрапейцаў, заявіла ў чацвер кіраўнік знешнепалітычнага ведамства Еўрасаюза Кая Калас, піша BBC.
«Мы, еўрапейцы, заўсёды падтрымлівалі доўгатэрміновы і справядлівы мір, і мы вітаем любыя намаганні па яго дасягненні. Вядома, для таго, каб любы план спрацаваў, патрэбныя ўкраінцы і еўрапейцы», — заявіла Калас.
«Мы вітаем мірныя намаганні, але… На коне, вядома ж, бяспека Еўропы. Таму мы чакаем, што з намі будуць кансультавацца», — сказаў журналістам у Бруселі міністр замежных спраў Польшчы Радаслаў Сікорскі. «Абмежаванні на самаабарону накладаюцца не на ахвяру, а на агрэсара», — дадаў ён.
Міністр замежных спраў Іспаніі Хасэ Мануэль Альбарэс заявіў у Бруселі, што любы мірны план для Украіны немагчымы без удзелу Кіева і ЕС. Крыніца Reuters напярэдадні паведамляла, што Украіна не прымала ўдзелу ў падрыхтоўцы плана спынення вайны.
Напярэдадні СМІ паведамілі, што ў адміністрацыі Дональда Трампа таемна падрыхтавалі дэтальны план спынення вайны ва Украіне, які прадугледжвае не толькі тэрытарыяльныя саступкі, але і скарачэнне ўкраінскай арміі ўдвая. У плане, паводле даных журналістаў, ёсць і іншыя непрымальныя для Украіны патрабаванні.
Паводле даных NBC News, праект распрацоўвалі ў Белым доме, кансультуючыся з расійскім спецпрадстаўніком Кірылам Дзмітрыевым і ўкраінскімі афіцыйнымі асобамі.
Украінскі прэзідэнт Уладзімір Зяленскі неаднаразова адхіляў магчымасць перадачы тэрыторый краіне, якая напала на Украіну. Цяпер, як падкрэсліваюць СМІ, пазіцыі Зяленскага аслаблены карупцыйным скандалам.
Цяпер чытаюць
Адданага ябацьку, які абражаў Святлану Ціханоўскую ў Threads, кінулі за краты14
Каментары