Мінімум 5 000 чалавек загінулі падчас пратэстаў у Іране, у тым ліку каля 500 супрацоўнікаў сіл бяспекі, паведаміў ананімна іранскі чыноўнік агенцтву Reuters.
Ён таксама адзначыў, што адны з самых жорсткіх сутыкненняў і найбольшая колькасць смерцяў зафіксаваны ў курдскіх раёнах на паўночным захадзе Ірана.
Той чыноўнік абвінаваціў «тэрарыстаў і ўзброеных пагромшчыкаў» у забойстве «невінаватых іранцаў».
Нагадаем, днямі вярхоўны лідар Ірана аятала Алі Хаменэі ўпершыню публічна прызнаў, што падчас масавых пратэстаў у краіне загінулі тысячы людзей. Пры гэтым ён усклаў адказнасць за падзеі на ЗША і Ізраіль, абвінаваціўшы іх у падбухторванні народных выступленняў, асобна згадаўшы прэзідэнта ЗША Дональда Трампа.
Масавыя пратэсты ў Іране пачаліся 28 снежня 2025 года. У пачатку студзеня яны дасягнулі найбольшага маштабу: масавыя выступленні ахапілі амаль усе правінцыі, мільёны людзей выйшлі на вуліцы з патрабаваннямі звяржэння рэжыму. Найбольш жорсткія сутыкненні адбыліся з 8 па 12 студзеня, калі сілы бяспекі, паводле розных ацэнак, забілі ад некалькіх тысяч да дзясяткаў тысяч чалавек.
Пасля хвалі рэпрэсій актыўнасць пратэстаў значна знізілася: у гарадах з’явіліся ўзброеныя патрулі, а інфармацыя з краіны амаль перастала паступаць. На фоне гэтых падзей ЗША разглядалі магчымасць ваеннага ўдару па Іране, аднак пазней Трамп адмовіўся ад такога кроку, заявіўшы, што атрымаў запэўненні аб спыненні масавых забойстваў.
Каментары