У Аўстраліі масава закрываюць пляжы з-за нападаў акул. Ёсць ужо чатыры пацярпелыя
За два дні ў аўстралійскім штаце Новы Паўднёвы Уэльс адбыліся чатыры напады акул на людзей. Пасля гэтага ўлады закрылі каля 40 пляжаў і заклікалі жыхароў і турыстаў не заходзіць у ваду. Усе інцыдэнты, паводле звестак CNN, звязваюць з акуламі-быкамі, ці тупарылымі акуламі.
Першым пацярпеў 12‑гадовы хлопчык: у нядзелю на яго напала акула ў Сіднэйскай гавані, калі ён скакаў у ваду разам з сябрамі. Дзеці змаглі выцягнуць сябра на бераг, а ратавальнікі наклалі жгуты на абедзве нагі. Хлопчык знаходзіцца ў бальніцы ў крытычным стане.
У панядзелак акула напала на 25‑гадовага сёрфера на папулярным турыстычным пляжы Норт-Сцін у раёне Мэнлі. Мужчыну таксама шпіталізавалі ў цяжкім стане, яму дапамаглі выбрацца з вады людзі, якія знаходзіліся на пляжы.
У той жа дзень каля Дзі-Уай-Пойнт акула адкусіла кавалак даўжынёй каля 15 сантыметраў ад сёрфборда 11‑гадовага дзіцяці. Яшчэ адзін выпадак адбыўся на наступны дзень каля Пойнт-Пломер: акула схапіла дошку сёрфера, мужчына атрымаў нязначныя траўмы і пасля агляду дактароў быў адпушчаны дадому.
Эксперты тлумачаць павелічэнне рызыкі нападаў тым, што акулы-быкі часта трымаюцца ў мутнай вадзе каля вусцяў рэк, асабліва пасля моцных дажджоў. У апошнія выхадныя ў Сіднэі прайшлі самыя інтэнсіўныя залевы за апошнія дзесяць гадоў, што стварыла небяспечныя ўмовы.
Паводле слоў кіраўніка ратавальнай службы Стыва Пірса, такія выпадкі, калі ўсе пацярпелыя сталі ахвярамі рэальных нападаў, сустракаюцца вельмі рэдка. Нягледзячы на папярэджанні, некаторыя людзі ўсё адно заходзяць у ваду. Ратавальнікі асцерагаюцца, што з-за спёкі і святочных выхадных на ўзбярэжжа прыедзе шмат адпачывальнікаў.
Цяпер сітуацыю кантралююць ратавальныя і муніцыпальныя службы, якія выкарыстоўваюць дроны, верталёты і гідрацыклы. Спецыялісты адзначаюць, што вадзе можа спатрэбіцца да тыдня, каб стаць празрыстай, і толькі пасля гэтага рызыка сустрэч з акуламі зменшыцца.
Міжземнае мора можа страціць вялікіх белых акул
У Аўстраліі акула напала на падлетка. Яго выратавалі адважныя сябры
Навукоўцы ўпершыню зафіксавалі аранжавую акулу-няньку ФОТА
Навукоўцы паказалі ВІДЭА, як васьміног катаецца на самай хуткай у свеце акуле
Акулы атакавалі расійскіх турыстаў ля берагоў Філіпін. Аднаго забілі, другому адгрызлі руку
Цяпер чытаюць
У Беларусі множацца пляцоўкі для танцаў на свежым паветры — паглядзіце, як адпальваюць разам моладзь і пенсіянеры ў Серабранцы2
Каментары