Запуск расійскага аналага Starlink перанеслі з-за правалу вытворчасці спадарожнікаў
У Расіі перанеслі запуск першай партыі нізкаарбітальных спадарожнікаў шырокапалоснага доступу ў інтэрнэт (ШПД) з 16 апаратаў, які павінен быў быць ажыццёўлены ў канцы мінулага года кампаніяй «Бюро 1440», пiша «Коммерсант».
У верасні кіраўнік «Раскосмасу» Дзмітрый Баканаў абяцаў, што да канца 2025 года на арбіце ў рамках праекта «Рассвет» пачнецца разгортванне 300 першых спадарожнікаў для групоўкі, якая павінна стаць аналагам сістэмы Starlink Ілана Маска і забяспечыць «доступ у інтэрнэт у любым геаграфічным пункце».
Паводле слоў двух суразмоўцаў на касмічным рынку, перанос запуску 16 першых апаратаў на 2026 год можа быць звязаны з тым, што патрэбная колькасць апаратаў да гэтага часу не сабрана. У «Бюро 1440» са свайго боку заявілі, што кампанія праводзіць работы «ў адпаведнасці з мэтавымі тэрмінамі», і паабяцалі прадастаўляць звесткі аб ходзе рэалізацыі праекта «па меры праходжання [этапаў]».
«Дакладныя даты запускаў і астатняя адчувальная інфармацыя не падлягаюць разгалошванню», — гаворыцца ў паведамленні.
Нягледзячы на меркаванне крыніц «Коммерсанта», у снежні намеснік кіраўніка Мінлічбы Дзмітрый Угнівенка заяўляў, што «Бюро 1440» у мінулым годзе вырабіла неабходныя для запуску 16 спадарожнікаў.
На рэалізацыю праекта ў рамках нацпраекта «Эканоміка даных» выдзелена 102,8 млрд расійскіх рублёў (1,3 млрд долараў) з федэральнага бюджэту. Яшчэ 329 млрд руб. (4,34 млрд долараў) накіруе «Бюро 1440» з уласных сродкаў (да 2030 года).
У чэрвені 2025 года Баканаў заяўляў, што па праекце «Рассвет» да 2035 года будзе запушчана больш за 900 нізкаарбітальных спадарожнікаў, прызначаных для забеспячэння ШПД у інтэрнэт. Камерцыйная эксплуатацыя больш за 250 з іх, як чакаецца, пачнецца ў 2027 годзе. Таксама плануецца разгарнуць яшчэ больш за 100 апаратаў дыстанцыйнага зандзіравання зямлі.
Згодна з апісаннем федпраекта «Інфраструктура доступу ў інтэрнэт» нацпраекта «Эканоміка даных», у 2025 годзе на арбіту павінна было быць выведзена 16 першых апаратаў, у 2026-м — іх лік дасягне 156, у 2027-м — 292, а ў 2028-м — 318. Для гэтага да 2030 года плануецца ажыццявіць 24 запускі. Зараз на арбіце разгорнуты толькі шэсць спадарожнікаў «Бюро 1440», запушчаных у рамках двух эксперыментальных місій.
У сеткі Starlink, распрацаванай кампаніяй Ілана Маска SpaceX, на арбіце на вышыні 550 км разгорнута група з больш чым 7 тыс. спадарожнікаў.
На Шры-Ланцы ў 37 гадоў памёр беларускі кінапрадзюсар Андрэй Маталыга4
Каментары