У Мінабароны патлумачылі, чаму людзей хапаюць на вайсковыя зборы раптоўна
На пытанне, чаму позвы на вайсковыя зборы цяпер уручаюць амаль напярэдадні з’яўлення ў ваенкамат, адказала ў афіцыйным тэлеграм-канале афіцыйная прадстаўніца Міністэрства абароны Рэспублікі Беларусь падпалкоўнік Наталля Гаўрусік.
Паводле слоў вайсковай чыноўніцы, такая практыка звязаная перадусім з раптоўнымі праверкамі баявой гатоўнасці. Іх галоўная мэта — ацаніць рэальны стан войскаў і гатоўнасць грамадзян да абароны краіны. Таму планы загадзя не агучваюцца, а тэрмін апавяшчэння можа быць мінімальным — часам менш за суткі.
У міністэрстве адзначаюць, што важна праверыць, наколькі хутка ваеннаабаавязаныя могуць прыбыць у ваенкамат, а вайсковыя часткі — аператыўна даўкамплектавацца. Калі папярэдзіць людзей загадзя, такая праверка не будзе аб’ектыўнай.
Такім чынам, атрыманне позвы непасрэдна перад датай яўкі называюць не арганізацыйнай памылкай, а запланаваным элементам праверкі баявой гатоўнасці.
Акрамя таго, адзначае Наталля Гаўрусік, падчас праходжання збораў за ваеннаабавязаным захоўваецца сярэдні заробак або прадугледжваецца грашовая кампенсацыя — у залежнасці ад формы ўласнасці працадаўцы. Гэта правіла распаўсюджваецца і на беспрацоўных грамадзян.
Раней паведамлялася, што з 16 лютага пачаўся чарговы этап праверкі боегатоўнасці беларускага войска. Цяпер у часці адпраўляюць і ваеннаабавязаных. Колькі чалавек і на які тэрмін, невядома — Мінабароны публічна пра гэта не паведамляе. Тое, як людзей выклікаюць на зборы, выклікае абурэнне, якім беларусы масава дзеляцца ў сацсетках.
Цяпер чытаюць
«Калі б не «Вясна-1996, мы б былі Татарстанам». 30 гадоў таму беларусы ўжо пратэставалі супраць Лукашэнкі і Расіі — як гэта было9
Каментары
A ŭ abaviazkach žonak budzie fiksavać čas z siekundamieram i rapartavać u vajenkamat !