Украіна прапаноўвала ЗША тэхналогіі процідзеяння іранскім беспілотнікам. Тыя не зацікавіліся, цяпер лічаць гэта «найбольшым промахам»

Падчас закрытай сустрэчы ў Белым доме 18 жніўня мінулага года прэзідэнт Украіны Уладзімір Зяленскі прапанаваў прэзідэнту Трампу беспілотнікі-перахопнікі. Гэта разглядалася як спосаб умацаваць сувязі і, паводле слоў аднаго з чыноўнікаў, выказаць падзяку за падтрымку ЗША ў змаганні з расійскай агрэсіяй.

Як сцвярджае Axios, украінскі бок нават падрыхтаваў прэзентацыю ў PowerPoint для амерыканскіх чыноўнікаў, на якой была паказаная карта Блізкага Усходу і змешчана прарочае папярэджанне: «Іран удасканальвае канструкцыю свайго беспілотніка-камікадзэ «Шахед».

У прэзентацыі прапаноўвалася ідэя стварэння «вузлоў барацьбы з беспілотнікамі» ў Турцыі, Іарданіі і дзяржавах Персідскага заліва, дзе размешчаныя базы ЗША, каб супрацьстаяць пагрозе з боку Ірана і яго памагатых.

«Мы хацелі пабудаваць «сцены з дронаў» і ўсё неабходнае, напрыклад, радары і гэтак далей», — цытуе выданне словы неназванага ўкраінскага чыноўніка.

Украінскі бок падышоў да прапановы прагматычна, аформіўшы яе як бізнэс-партнёрства ва ўлюбёным Трампу стылі the art of the deal: Украіна дае ноу-хау і стварае працоўныя месцы ў ЗША. У прэзентацыі адзначалася, што Кіеў можа дапамагчы стварыць да 20 мільёнаў адзінак зброі, каб забяспечыць амерыканскае дамінаванне ў сферы беспілотнікаў.

Павялічыць

У абмен на наданне ЗША доступу да сваёй вытворчасці дронаў і сістэм барацьбы з імі, а таксама да ноу-хау, Украіна прасіла магчымасць купляць амерыканскую зброю.

«Наша праблема — у абаротным капітале. Нашы рэсурсы дазвалялі нам вырабляць толькі 50% ад таго, што мы можам. Таму мы хацелі, каб ЗША інвеставалі астатнія 50% і мелі долю ў вытворчасці», — адзначыў украінскі чыноўнік і дадаў:

«На той сустрэчы… у жніўні Трамп папрасіў сваю каманду папрацаваць над гэтым, але гэта нічым не скончылася».

Амерыканскі чыноўнік, які бачыў прэзентацыю, пацвердзіў выданню, што каманда Зяленскага паказвала яе адміністрацыі. Паводле яго слоў, некаторыя ў адміністрацыі Трампа скептычна паставіліся да Зяленскага, лічачы яго празмерным «самапіяршчыкам» з краіны-сатэліта, якая не карыстаецца дастатковай павагай у Вашынгтоне.

«Мы падумалі, што гэта Зяленскі ў сваім стылі. Нехта вырашыў не купляцца на гэта», — сказаў чыноўнік.

У мінулы чацвер ЗША афіцыйна звярнуліся да Зяленскага па дапамогу ў барацьбе з дронамі, паведамляе The New York Times. А ў пятніцу ЗША абвясцілі пра планы разгортвання ўласнай супрацьдронавай сістэмы Merops на фоне нараканняў арабскіх саюзнікаў ЗША на атакі дронаў.

Выданне заўважае, што адзін з чыноўнікаў назваў амерыканскі адказ на іранскія дроны «расчароўваючым». Іншы прызнаў, што ўкраінскія дроны прыдаліся б, калі б былі разгорнутыя раней, хоць і назваў амерыканскія паказчыкі на тэатры ваенных дзеянняў «выдатнымі».

У Белым доме заяўляюць, што аперацыя праходзіць паспяхова, а колькасць атак знізілася на 90%. Тым не менш, патрэба ў новых тэхналогіях настолькі высокая, што нават сыны Трампа ў панядзелак абвясцілі пра новае камерцыйнае прадпрыемства па пастаўках украінскіх тэхналогій для дронаў Пентагону.

Як адзначае выданне са спасылкай на двух амерыканскіх чыноўнікаў, ігнараванне прапановы Украіны ў жніўні можа быць адным з найбуйнейшых тактычных пралікаў адміністрацыі Трампа.

Танныя іранскія «Шахеды» сталі прычынай гібелі сямі амерыканскіх вайскоўцаў. Амерыканскім сілам даводзілася траціць мільёны даляраў на дарагія ракеты для перахопу дронаў, якія каштуюць усяго ад 20 да 50 тысяч даляраў. Украінскія ж перахопнікі каштуюць нашмат танней.

«Калі і была тактычная памылка ці промах, якія мы дапусцілі напярэдадні гэтай [вайны ў Іране], дык вось ён», — прызнаў амерыканскі чыноўнік.

• 4
• 0
• 14
• 0
• 0
• 2
• 0
• 0