«Гэта стала адным з найлепшых рашэнняў». Расіянка, якая год таму пераехала з Масквы ў Мінск, падзялілася сваімі ўражаннямі
«Інтэрнэт тут працуе стабільна і паўсюль, працуюць усе сацсеткі і дадаткі, якія забароненыя ў Расіі».
Пяць плюсаў жыцця ў Мінску
Анастасія год таму пераехала жыць з Масквы ў Мінск. У сваім блогу ў інстаграме яна расказвае пра плюсы, якія заўважыла.
Першае — гэта кошт жыцця.
«За арэнду жытла, за прадукты і нават за кубачак кавы вы будзеце плаціць тут нашмат менш», — кажа яна і прыводзіць прыклады з цэнамі на малочку, якая, па яе словах, у Мінску ў паўтара разу таннейшая, чым у Маскве.
Наступнай перавагай дзяўчына называе інтэрнэт.
«Апроч таго, што сам інтэрнэт тут працуе стабільна і паўсюль, тут працуюць усе сацсеткі і дадаткі, якія забароненыя ў Расіі».
Для Анастасіі гэта важна, бо яна працуе аддалена.
Трэцяе — у Беларусі засталося больш заходніх брэндаў, які сышлі з Расіі пасля пачатку поўнамаштабнай вайны.
«Zara, Bershka, Pull&Bear — усё гэта тут засталося, а на паліцах у краме вы можаце адшукаць Cola або іншыя прадукты, якія вы любілі, але, на жаль, якіх цяпер няма ў Расіі».
Чацвёртым плюсам Анастасія называе хуткасць. У Маскве на тое, каб дабрацца да сяброўкі, якая жыла за 10 км ад яе, сыходзіла 40 хвілін. У Мінску ж яна ўкладаецца за 20 хвілін, каб праехаць з аднаго пункта ў іншы.
«І ты гэта дужа адчувальна, бачыш, што часу для жыцця застаецца нашмат больш».
Пятай перавагай Мінска над Масквой яна адзначае больш спагадлівых і добрых людзей.
«Але я таксама звязваю гэта з тэмпам жыцця, бо калі табе не трэба нікуды бегчы і спяшацца, то ў цябе застаецца час, каб пасміхацца сабе і асяроддзю, ад чаго свет становіцца больш пазітыўным і добрым», — лічыць дзяўчына.
Пра што спрачаюцца ў каментарах
У каментарах пад відэа завязалася даволі гарачая дыскусія. Многія заўважаюць, што жыць у Мінску танна, толькі калі пералічваць на маскоўскую зарплату.
Таксама шмат хто звярнуў увагу на тое, што дзяўчына працуе аддалена.
«Калі вы працуеце аддалена, то так, у Беларусі добра. Але калі захочаце знайсці там высокааплатную працу, то гэта будзе складана», — напісала адна з каментатарак.
«Калі вы працуеце дыстанцыйна, то так, там жыць камфортна, але я ў сябе на радзіме засынаю. Там усё павольна, хочацца паскорыць», — напісала беларуска, якая, наадварот, пераехала ў Расію.
Таксама ў каментарах хапае пытанняў, як атрымаць ДНЖ у Беларусі і ці не складана расіяніну там працаўладкавацца.
Наконт атрымання ДНЖ многія пішуць, што гэта даволі складаная працэдура. Што да тэрмінаў атрымання, то самыя хуткія вынікі — гэта 1,5—2 месяцы, але ў іншых сыходзіць па 3—4 месяцы.
Некаторыя жартуюць, што хопіць ужо рэкламаваць Мінск расіянам, бо ён не гумовы.
Адзін з каментатараў напісаў, што, падобна, беларусы хутка ўзненавідзяць Пуціна за адключэнне інтэрнэту ў Расіі мацней, чым самі расіяне.
Каментары