25 сакавіка зранку стала вядома, што ў Латвію і Эстонію з тэрыторыі Расіі заляцелі баявыя дроны, якія ўпалі на яе тэрыторыі. Адзін з іх выбухнуў, а другі ўрэзаўся ў электрастанцыю. Пасля расследавання стала вядома, што гэта не расійскія беспілотнікі, а ўкраінскія, якія, відаць, ляцелі атакаваць аб'екты ў ваколіцах Санкт-Пецярбурга, ды збіліся з курсу.
Абломкі дрона, які ўпаў і выбухнуў у Краслаўскім краі Латвіі
Прэзідэнт Латвіі Эдгар Рынкевічс паведаміў, што беспілотнік ноччу заляцеў у паветраную прастору Латвіі ў межах аперацыі Украіны супраць аб’ектаў на тэрыторыі Расіі. Інцыдэнт адбыўся раніцай, інфармацыю пра яго службы атрымалі прыкладна каля 4‑й гадзіны.
Па словах палітыка, усе адказныя структуры — Узброеныя сілы, паліцыя і памежная служба — адрэагавалі належным чынам, а мясцовыя ўлады былі аператыўна праінфармаваныя.
Рынкевіч падкрэсліў, што гэты выпадак паказаў важнасць умацавання супрацьпаветранай абароны, асабліва на мяжы. У краіне ўжо праводзяцца работы па ўмацаванні інфраструктуры, але галоўным выклікам застаецца менавіта абарона ад беспілотнікаў.
Ён таксама адзначыў, што падобныя інцыдэнты могуць паўтарыцца, таму неабходна далей развіваць сістэмы, здольныя своечасова выяўляць і нейтралізаваць дроны, незалежна ад іх паходжання і цэляў.
У Эстоніі таксама заявілі, што беспілотнік, які ўначы ўрэзаўся ў комін электрастанцыі каля вёскі Ауверэ — украінскі.
Кіраўнік эстонскай Паліцыі бяспекі Марга Паласан паведаміў, што каля 3:43 дрон заляцеў у паветраную прастору Эстоніі з боку Расіі і праз некалькі кіламетраў урэзаўся ў комін электрастанцыі, пасля чаго адбыўся выбух.
Паводле папярэдняй інфармацыі, беспілотнік збіўся з курсу, прычым на яго маглі ўздзейнічаць яшчэ ў расійскай паветранай прасторы. Абломкі сведчаць, што гэта быў украінскі дрон. Людзі ў выніку здарэння не пацярпелі.
Па факце інцыдэнту пачата крымінальная справа, спецыялісты вывучаюць рэшткі апарата і высвятляюць дэталі. Таксама не выключаецца, што на борце магла быць выбухоўка, але гэта яшчэ павінна пацвердзіць расследаванне.
Акрамя таго, паведамляецца, што паветраную прастору Эстоніі парушалі і іншыя беспілотнікі, у сувязі з чым была задзейнічаная місія паветранага патрулявання краін Балтыі.
Раней падобны інцыдэнт быў зафіксаваны ў Літве. Дрон, які заляцеў на яе тэрыторыю, упаў і выбухнуў у памежным з Беларуссю Варэнскім раёне, таксама аказаўся ўкраінскім.
Падчас начной атакі ўкраінскіх дронаў у порце Выбарга быў пашкоджаны найноўшы расійскі ледакол
У Эстоніі беспілотнік, які прыляцеў з Расіі, урэзаўся ў электрастанцыю
У Латвію з тэрыторыі Расіі заляцеў і ўзарваўся дрон
У Ленінградскай вобласці адбылася масіраваная атака дронаў: пажары ў партах і калапс у Пулкаве
Каментары
Майце гонар адказваць за балабольства!!!