У Гродне знеслі амаль 100‑гадовы дом на рагу Міцкевіча і Філарэта — яшчэ адзін помнік драўлянага канструктывізму
Драўляны зялёны будынак на рагу вуліц Міцкевіча і Мітрапаліта Філарэта ў Гродне знеслі. Пра гэта паведамляюць жыхары горада ў сацыяльных сетках, піша Hrodna.life. Гаворка ідзе пра дом у стылі драўлянага канструктывізму 1930‑х гадоў, які працяглы час пуставаў, а пасля яго вырашылі перарабіць пад гатэль. Першапачаткова меркавалася захаваць частку дома. Але, мяркуючы па ўсім, будынак гатэля на гэтым месцы пабудуюць нанова.
Праект будучага гатэля і планы на рэканструкцыю
Раней паведамлялася, што праект будучай гасцініцы па вул. Міцкевіча, 1 прадугледжваў рэканструкцыю будынка. Пасля з’явілася інфармацыя, што ад першапачатковай пабудовы ў гістарычным раёне Новы Свет застануцца толькі два фасады ў змененым выглядзе. Таксама будзе перароблены і суседні аднапавярховы дом 1915 года пабудовы.
Згодна з праектнай дакументацыяй, на першым паверсе павінны размясціцца вестыбюль гатэля, рэстаран і кавярня. Другі і трэці паверхі аддалі пад гатэльныя нумары і апартаменты, а ў падвале планавалі абсталяваць дапаможныя памяшканні для аб’ектаў грамадскага харчавання.
У будынак збіраліся правесці цэнтралізаванае халоднае водазабеспячэнне, каналізацыю, вентыляцыю і кандыцыянаванне, а ацяпленне запусціць ад праектаванай аўтаномнай кацельні. Заказчыкам работ выступае гандлёвы дом «Шакоціс».
Паколькі пабудова размешчана ў водаахоўнай зоне ракі Юрысдыка і ў зоне аховы гісторыка-культурнай каштоўнасці «Гістарычны цэнтр Гродна», рэалізоўваць праект павінны былі з улікам комплекснага навуковага даследавання ад ТАА «Навукова-праектны цэнтр «РЭСТАБІЛІС». Усе земляныя і будаўнічыя работы патрабавалі строгага археалагічнага нагляду.
Будынак на рагу Міцкевіча быў пабудаваны пасля 1932 года, сказана ў даведніку «Біяграфія гарадзенскіх вуліц». Ён з’яўляецца прыкладам драўлянага канструктывізму. На доме гарызантальная ашалёўка. Асноўны аб’ём двухпавярховы. Кампазіцыйная выразнасць пабудаваная на суадносінах розных па вышыні аб’ёмаў модуляў. Нізкасхільны ва ўсе бакі дах схаваны за шырокім карнізам. Вокны будынка розняцца па памерах.
На модулі пад краму яны шырокія, вітрынныя, на жылым маюць аканіцы аднолькавага фасону, але за кошт падаконных цяг успрымаюцца як адзіны рытм. Малыя квадратныя акенцы трэцяга паверха надаюць гэтай частцы будынка выгляд вежы. Магчыма, у 1937 годзе тут размяшчалася адна з крам таварыства «Ранак» (Jutrzenka).
Апошнія жыхары выехалі адсюль у 2017 годзе. Сярод планаў быў знос дома і будаўніцтва на гэтым месцы гандлёвага цэнтра. У 2020 годзе будынак выстаўлялі на аўкцыён разам з дамамі на Міцкевіча, 7 і Міцкевіча, 9. Два апошнія тады прадалі іншаму ўласніку, работы ў іх ужо ідуць.
За апошнія месяцы горад страціў яшчэ два знакавыя будынкі ў стылі канструктывізму і функцыяналізму.
Так, у сакавіку 2026 года стала вядома пра знос драўлянага дома міжваеннага перыяду па вуліцы Асіпенкі, 3. Дом, пабудаваны ў 1930‑я гады ў стылі функцыяналізму і драўлянага канструктывізму, уваходзіў у ансамбль «Настаўніцкай калоніі» — унікальнага для Беларусі комплексу драўлянай забудовы.
У траўні знеслі яшчэ адзін драўляны дом міжваеннага перыяду — будынак па вуліцы Чкалава, 13. Ён быў пабудаваны ў 1930‑х гадах і лічыўся прыкладам драўлянага канструктывізму. Дом таксама ўваходзіў у «Настаўніцкую калонію».
У Вялікай Бераставіцы знеслі ўнікальны заезны двор ХІХ стагоддзя. На сцяне з савецкіх часоў вісела шыльда «ахоўваецца законам»
Драўляны канструктывізм пад коўш: у Гродне знішчылі адзін гістарычны дом і ўзяліся за другі
У Гродне не знеслі стары будынак, а пачалі яго рэканструкцыю. Вось як ён будзе выглядаць
Каментары