26 чэрвеня Мінскі гарадскі суд вынес прысуды журналісту Кірылу Пазняку і ягонай дачцэ Яніне. Пра гэта даведаўся ад сваіх крыніц тэлеканал «Белсат».
Кірылу Пазняка пазбавілі волі на тры з паловай гады, столькі ж прасіла для яго і абвінавачанне. Пакуль дакладна невядома, колькі давядзецца правесці за кратамі ягонай дачцэ Яніне, але прасілі для яе тры гады.
Акрамя таго, Кірыла Пазняк павінен заплаціць штраф у 550 базавых велічыняў (24750 рублёў). Якую суму мусіць заплаціць ягоная дачка, пакуль невядома.
Бацьку і дачку абвінавацілі паводле двух артыкулаў — 361‑1 і 369‑1 Крымінальнага кодэкса Беларусі — у стварэнні экстрэмісцкага фармавання і дыскрэдытацыі Рэспублікі Беларусь.
Кірыла Пазняк быў затрыманы 4 верасня 2025 года. Тады КДБ абвесціў «экстрэмісцкім фармаваннем» YouTube-канал «Платформа 375», а журналіста назваў «арганізатарам» гэтага «фармавання». У той жа дзень, паведамлялі праваабаронцы, затрымалі і 20‑гадовую дачку Кірылы Пазняка — Яніну Пазняк.
Вядома, што ў 2021—2022 гадах канал «Платформа 375» правёў некалькі дэбатаў паміж праўладнымі прапагандыстамі і іх апанентамі, што вымушана выехалі з краіны. Апошні эфір адбыўся 3 снежня 2022 года з удзелам Рыгора Азаронка (СТВ), Юрыя Цераха («СБ. Беларусь сегодня») — у Мінску, а таксама Алега Талерчыка (сузаснавальнік арганізацыі былых супрацоўнікаў сілавых структур «Байпол») і вядучага Дзяніса Дудзінскага.
Разгляд справы Пазнякоў пачаўся 17 чэрвеня. Першае пасяджэнне суда было прызначанае на 14 мая, але праз цяжкі стан здароўя журналіста яго давялося перанесці. У ізалятары на вуліцы Акрэсціна Кірыла Пазняк перанёс COVID-19 і цяжкую пнеўманію, якая дала ўскладненні на лёгкія. Некалькі дзён ён правёў на апараце штучнага дыхання. Кірыла праходзіў лячэнне ў турэмным шпіталі.
Пакуль прысуд не набудзе моц, Кірыла Пазняк і ягоная дачка Яніна будуць знаходзіцца ў следчым ізалятары. Тэрмін утрымання пад вартай падчас следства суд палічыў як дзень за паўтара.
Каментары