26 červienia Minski haradski sud vynies prysudy žurnalistu Kiryłu Paźniaku i jahonaj dačce Janinie. Pra heta daviedaŭsia ad svaich krynic telekanał «Biełsat».
Kiryłu Paźniaka pazbavili voli na try z pałovaj hady, stolki ž prasiła dla jaho i abvinavačańnie. Pakul dakładna nieviadoma, kolki daviadziecca pravieści za kratami jahonaj dačce Janinie, ale prasili dla jaje try hady.
Akramia taho, Kiryła Paźniak pavinien zapłacić štraf u 550 bazavych vieličyniaŭ (24750 rubloŭ). Jakuju sumu musić zapłacić jahonaja dačka, pakul nieviadoma.
Baćku i dačku abvinavacili pavodle dvuch artykułaŭ — 361‑1 i 369‑1 Kryminalnaha kodeksa Biełarusi — u stvareńni ekstremisckaha farmavańnia i dyskredytacyi Respubliki Biełaruś.
Kiryła Paźniak byŭ zatrymany 4 vieraśnia 2025 hoda. Tady KDB abvieściŭ «ekstremisckim farmavańniem» YouTube-kanał «Płatforma 375», a žurnalista nazvaŭ «arhanizataram» hetaha «farmavańnia». U toj ža dzień, paviedamlali pravaabaroncy, zatrymali i 20‑hadovuju dačku Kiryły Paźniaka — Janinu Paźniak.
Viadoma, što ŭ 2021—2022 hadach kanał «Płatforma 375» pravioŭ niekalki debataŭ pamiž praŭładnymi prapahandystami i ich apanientami, što vymušana vyjechali z krainy. Apošni efir adbyŭsia 3 śniežnia 2022 hoda z udziełam Ryhora Azaronka (STV), Juryja Cieracha («SB. Biełaruś siehodnia») — u Minsku, a taksama Aleha Talerčyka (suzasnavalnik arhanizacyi byłych supracoŭnikaŭ siłavych struktur «Bajpoł») i viadučaha Dzianisa Dudzinskaha.
Razhlad spravy Paźniakoŭ pačaŭsia 17 červienia. Pieršaje pasiadžeńnie suda było pryznačanaje na 14 maja, ale praz ciažki stan zdaroŭja žurnalista jaho daviałosia pieranieści. U izalatary na vulicy Akreścina Kiryła Paźniak pieranios COVID-19 i ciažkuju pnieŭmaniju, jakaja dała ŭskładnieńni na lohkija. Niekalki dzion jon pravioŭ na aparacie štučnaha dychańnia. Kiryła prachodziŭ lačeńnie ŭ turemnym špitali.
Pakul prysud nie nabudzie moc, Kiryła Paźniak i jahonaja dačka Janina buduć znachodzicca ŭ śledčym izalatary. Termin utrymańnia pad vartaj padčas śledstva sud paličyŭ jak dzień za paŭtara.
Ciapier čytajuć
Paśla biełaruskaj vioski Šnajderaŭ bolš nie biantežyć pytańnie ŁHBT. Siamja z Hiermanii, jakaja stała hierojami prapahandy, viartajecca ŭ ES6
Kamientary