Заўзятары, якія прыехалі на чэмпіянат свету ў ЗША, у шоку ад амерыканскай культуры чаявых
«Нават самая танная ежа ў рэстаране ўсё роўна каштуе каля 30 даляраў, а калі дадаць чаявыя, скажам, 13—20%, ты ў выніку думаеш: о божа, я мог бы ўзяць яшчэ адну порцыю за гэтыя грошы».
Многія замежныя заўзятары, якія прыехалі ў ЗША на чэмпіянат свету па футболе, у шоку ад мясцовай культуры пакідання чаявых афіцыянтам, расказвае BBC.
У ЗША персанал некаторых рэстаранаў і бараў атрымлівае крыху больш за 2 даляры за гадзіну, і яны разлічваюць, што кліенты пакінуць каля 20% ад агульнай сумы рахунку, каб яны маглі зарабіць на жыццё.
Сваім незадавальненнем дзяліліся і супрацоўнікі сферы гасціннасці: адзін уладальнік бара распавёў BBC, што многія турысты, якія прыехалі на чэмпіянат свету, пакідаюць дрэнныя чаявыя.
Аўстралійскія заўзятары Крыс О’Флін і Роберт Макнамара распавялі BBC, што высокія цэны на квіткі на футбольныя матчы спустошылі іх фінансы, а неабходнасць плаціць чаявыя яшчэ больш павялічвае выдаткі.
«Большасць аўстралійцаў тут лічаць так: плаціце свайму персаналу больш высокі заробак. Клопат пра тое, каб супрацоўнікі атрымлівалі добрую аплату, павінен ляжаць на бізнэсе, а не на кліенце».
Макнамара адзначыў, што як госці яны імкнуцца прытрымлівацца звычаяў, але чаявыя сталі для іх культурным шокам.
«Яны чакаюць чаявых пасля кожнага напою, таму гэта вельмі хутка становіцца дарагім. Ты купляеш напой і дадаеш яшчэ 5 даляраў. Гэта цяжка зразумець».
Маіка Асахі і яе сям’я прыехалі з Токіа, каб паглядзець на гульню зборнай Японіі ў Даласе. Яна распавяла BBC, што дома яны не пакідаюць чаявых. «Цэны без чаявых і так вельмі высокія, а з чаявымі — гэта ўжо занадта», — сказала Асахі.
Яшчэ адзін японскі заўзятар, Акіхіра, які падарожнічае з сынам, таксама паскардзіўся на высокія цэны.
«Нават самая танная ежа ў рэстаране ўсё роўна каштуе каля 30 даляраў, а калі дадаць чаявыя, скажам, 13—20%, ты ў выніку думаеш: о божа, я мог бы ўзяць яшчэ адну порцыю за гэтыя грошы», — сказаў ён.
Бар Banter у Брукліне, дзе паказваюць футбол, прымае нямала брытанскіх і еўрапейскіх турыстаў — асабліва падчас чэмпіянату свету. Але яны вядомыя тым, што пакідаюць вельмі дрэнныя чаявыя, калі наогул іх пакідаюць.
Бар змяніў сістэму, таму цяпер кліенты з браніраваннем павінны загадзя аплачваць напоі, уключаючы збор за абслугоўванне.
У Лос-Анджэлесе, штат Каліфорнія, базавы заробак для супрацоўнікаў, якія атрымліваюць чаявыя, з’яўляецца адным з самых высокіх у краіне і складае 16,20 даляра за гадзіну.
Джозэф Пітруцэлі, уладальнік рэстарана Wurstküche ў нямецкім стылі ў цэнтры Лос-Анджэлеса, сказаў, што яны не заўважылі вялікай розніцы ў звычках пакідання чаявых падчас чэмпіянату свету.
«Мы пакідаем нашы [рэкамендаваныя] чаявыя на нізкім узроўні — у раёне 10, 15 і 20%, але я бачыў месцы, дзе прапануюць 20, 25 і 30%, што, на мой погляд, вельмі шмат», — сказаў ён.
Памілаваныя 15 чалавек, сярод якіх 13 палітвязняў15
Каментары
Некоторым болельщикам стоило бы уважать традиции страны пребывания. Извините, это Америка, с её высокими зарплатами и расходами.