«Пачынаю разумець людзей, якія жывуць у турыстычных гарадах і не любяць заезджых». Што турыстычны бум прыносіць Гродну
Паток турыстаў, якія наведваюць Гродна, б'е рэкорды, але выглядае, што такія змены ў штодзённым жыцці горада даспадобы не ўсім.
Апошнія некалькі гадоў Гродна перажывае сапраўдны турыстычны бум, і колькасць ахвотных наведаць горад працягвае павялічвацца.
Хоць поўнай статыстыкі па агульным турыстычным патоку няма, ёсць шэраг ускосных паказчыкаў, якія кажуць на павялічэнне колькасці турыстаў у параўнанні з 2025 годам. Дый самі гараджане адзначаюць, што турыстаў стала яшчэ больш.
Што паказваюць лічбы
Так, напрыклад, па стане на 25‑26 ліпеня хостэлы і гасцініцы Гродна былі запоўненыя, за выключэннем некалькіх люксавых нумароў. І гэта пры тым, што толькі за 2025 год у горадзе дадалося 528 новых ложка-месцаў, што складае траціну ад цяперашняга аб'ёму.
Паводле загадчыцы сектара турызму ўпраўлення эканомікі Гродзенскага гарвыканкама Веры Мурашовай, за першае паўгоддзе гэтага года колькасць пастаяльцаў у гасцініцах павялічылася амаль на 50%.
Летам у выхадныя дні ў Гродна прыязджаюць больш за 50 турыстычных аўтобусаў з арганізаванымі групамі, паведаміла чыноўніца. А сярод турыстаў, якія прыязджаюць у Гродна, усё больш тых, хто наведвае горад паўторна.
Расце попыт і на пасутачную арэнду кватэр, колькасць якіх таксама павялічваецца.
Людзі, якія здаюць кватэры на суткі, кажуць, што жыллё ў добрай лакацыі ў сезон (з красавіка па кастрычнік) можа быць забраніравана на месяц наперад.
Цэнтр не для мясцовых
Раней «Наша Ніва» пісала, што Гродна з'яўляецца лідарам па колькасці пасутачных кватэр на душу насельніцтва. І такое лідарства мае як пазітыўныя, так і негатыўныя наступствы. Па-першае, у горадзе моцна выраслі цэны на кватэры ў цэнтры. Па-другое, знайсці кватэру ў цэнтры і паблізу яго, якую здаюць на доўгі тэрмін, амаль нерэальна, бо ўласнікам значна выгадней здаваць яе на суткі.
Арэндныя стаўкі на пасутачную арэнду кватэр радуюць уласнікаў, але часам шакуюць турыстаў.
Напрыклад, калі глядзець кватэры на 15‑16 жніўня, то самыя даступныя пачынаюцца з 200 рублёў за ноч на двух чалавек з не самым сучасным рамонтам у спальных раёнах горада.
За кватэры з добрым рамонтам у цэнтры або ў блізкай да цэнтра частцы горада просяць ужо 250‑300 рублёў за суткі пры ўмове пражывання двух чалавек.
Чалавек, які здае некалькі кватэр у Гродне, кажа, што некаторыя турысты з іншых гарадоў Беларусі нярэдка адмаўляюцца ад начоўкі праз высокі кошт.
«Калі людзі не паклапаціліся пра жытло загадзя, то вольнымі застаюцца толькі самыя дарагія варыянты. Прычым часцяком дарагія яны не таму, што з добрым рамонтам і ў файным месцы, а проста праз тое, што ўсе іншыя ўжо забраніраваныя. Таму многія вымушана прыязджаюць толькі на дзень», — кажа суразмоўца, які ўжо не першы год у гэтым бізнэсе.
Па яго словах, амаль усе турысты, якія заязджаюць да яго, — гэта расіяне, якія здымаюць жытло праз сэрвіс «Суточно.ру», беларусы ж часцей шукаюць праз «Куфар». Праўда, ім кватэры дастаюцца зрэдку, бо расіяне браніруюць іх раней, паколькі больш загадзя плануюць свае паездкі, чым беларусы.
Іншы суразмоўца пачаў здаваць кватэру на суткі толькі сёлета.
«Да гэтага здавалі больш за год у доўгатэрміновую арэнду, а з вясны паспрабавалі здаваць на суткі. Атрымалася, што гэта нашмат выгадней. Нават выгадней, чым хадзіць на працу», — кажа гарадзенец, які мае двушку непадалёк ад цэнтра горада.
Музеі таксама адчуваюць наплыў
У Міністэрстве культуры заявілі, што за першае паўгоддзе 2026 года гродзенскі Стары замак прыняў на 6000 наведвальнікаў больш, чым за аналагічны перыяд 2025 года.
Тое, што турыстаў сёлета прыкметна больш, чым было нават у 2025 годзе, адзначаюць і экскурсаводы. Натуральна, што асноўны рост ідзе за кошт расіян, для якіх Гродна стаў ледзь не адзінай магчымасцю адчуць сябе ў старым еўрапейскім горадзе. Маўляў, Мінск ад сябе такіх еўрапейскіх уражанняў не пакідае.
Што да іншых замежнікаў, то, па назіраннях гідаў, у Гродне ад турыстаў нярэдка можна пачуць польскую мову, але сказаць, што палякаў гэтак жа шмат, як было да кавіду і вайны, не выпадае.
Таксама сустракаюцца турысты з Літвы і Латвіі. Саміх жа машын на польскіх і літоўскіх нумарах у горадзе нямала, але гэта не заўсёды абавязкова турысты, бо за стырном могуць быць і беларусы, якія жывуць ці працуюць у гэтых краінах.
Задаволеныя не ўсе
І калі людзі, якія зарабляюць на турыстах, задаволеныя сітуацыяй, то шараговыя гараджане турыстычны бум успрымаюць інакш.
Нярэдка людзі скардзяцца на паводзіны расіян як на дарогах, так і ў цэлым.
«Большасць турыстаў едуць да нас з Расіі, машын на расійскіх нумарах шмат, і частка з іх ездзяць і паркуюцца па-хамску», — кажа гараджанін і дадае, што, нават калі проста шпацыруе па вуліцы, часцяком можна апазнаць расіян па іх паводзінах.
Суразмоўца кажа, што з аднаго боку яму прыемна, што ягоны горад цікавы турыстам, а з іншага — з'яўляецца адчуванне, што Гродна больш ужо табе не належыць.
«Цяпер я пачынаю разумець людзей, якія жывуць у турыстычных гарадах і не любяць турыстаў. Часам у цэнтры іх можна ўбачыць настолькі шмат, што ісці на шпацыр у гэты натоўп не хочацца», — прызнаецца гарадзенец.
Іншая жыхарка Гродна таксама адзначае, што сёлета надта шмат турыстаў прыязджае ў горад.
«У асноўным, канечне, расіяне, прычым з розных рэгіёнаў. Сёлета неяк часта трапляюцца на вока машыны з Самарскай вобласці. Раней такой колькасці машын на расійскіх нумарах не назірала», — кажа гарадзенка.
Жанчына адзначае, што праз вялікую колькасць турыстаў знайсці парковачнае месца ў цэнтры стала яшчэ складаней.
«Часам стала складаней трапіць у нейкае кафэ, бо ўсё занята турыстамі. У раёне замкаў і сінагогі яны літаральна ходзяць натоўпамі. Гэта ўсё яшчэ трошкі нязвыкла і крыху няўтульна, калі хочаш проста спакойна прайсціся па горадзе», — кажа гарадзенка.
Каментары
цікава маскоўцы а чаму ? чаму 2 старажытных месца ВКЛ так адрозніваюцца ? што здарылася ў 1944-50?