Wildberries плануе хаваць свае тавары на складах у Беларусі, Казахстане і Узбекістане
Расійскі маркетплэйс Wildberries змяняе лагістыку пасля серыі атак на свае складскія комплексы. Паводле інфармацыі, агучанай прадстаўнікамі кампаніі на сустрэчах з прадаўцамі, тавары для працяглага захоўвання плануюць перамяшчаць на склады ў Беларусі, Казахстане і Узбекістане, паведамляе The Moscow Times.
Паводле ўдзельнікаў гэтых сустрэч, кампанія ўжо пачала перанакіроўваць частку тавараў на замежныя склады. Частка лагістычных цэнтраў ужо працуе, іншыя яшчэ будуюцца або арандуюцца.
Прадаўцы занепакоеныя, што такая схема можа павялічыць тэрміны і кошт дастаўкі. На іх думку, асноўныя аб'ёмы продажаў цяпер залежаць ад складоў працяглага захоўвання, а больш складаная лагістыка можа аслабіць канкурэнтаздольнасць маркетплэйса.
Яшчэ адной праблемай можа стаць неабходнасць афармлення мытных дакументаў пры перамяшчэнні тавараў праз дзяржаўныя межы. Гэта можа стварыць дадатковыя цяжкасці для часткі прадаўцоў.
У Казахстане Wildberries ужо мае каля 46 тысяч квадратных метраў складскіх плошчаў і будуе яшчэ каля 260 тысяч квадратных метраў, якія плануецца ўвесці ў эксплуатацыю ў першым квартале 2027 года.
У Беларусі кампанія таксама ўзводзіць буйны лагістычны комплекс плошчай каля 140 тысяч квадратных метраў. Да мая былі ўведзеныя ў эксплуатацыю каля 20 тысяч квадратных метраў, а поўнае завяршэнне будаўніцтва чакаецца напрыканцы 2026 або ў пачатку 2027 года. Акрамя таго, раней кампанія заяўляла пра намер пабудаваць у Беларусі яшчэ адзін складскі комплекс.
Ва Узбекістане Wildberries стварае цэнтральнаазіяцкі лагістычны хаб, які павінен аб'яднаць новыя складскія магутнасці і забяспечыць перавозкі паміж Расіяй, Узбекістанам, краінамі Блізкага Усходу і Афрыкі.
Паводле ацэнак аналітыкаў, у выніку ўкраінскіх атак на тэрыторыі Расіі былі пашкоджаныя або разбураныя складскія памяшканні Wildberries агульнай плошчай каля 0,9—1,15 мільёна квадратных метраў, што складае прыкладна пятую частку лагістычнай інфраструктуры кампаніі. Гэта ўжо прывяло да павелічэння тэрмінаў дастаўкі і росту транспартных выдаткаў.
Беларускі бізнэс просіць улады дапамагчы пацярпелым прадаўцам Wildberries
Cклады Wildberries: пад Масквой і ў Цверы — міма, у Пецярбургу пайшло з дымам. Ёсць пападанне і ў НПЗ
УСУ нанеслі ўдар па складзе Wildberries пад Уладзімірам
Кіраўніцу «Вайлдберыз» Таццяну Кім унеслі ў базу «Міратворца»
Дроны ўдарылі па складах Wildberries і НПЗ у Валгаградзе
Цяпер чытаюць
Беларускія рэпетытары ў паніцы: праз праблемы «Яндэкса» яны могуць страціць матэрыялы, якія напрацоўвалі гадамі23
Каментары