На Камароўцы пачалося паляванне на сала і мяса — што і колькі каштуе на рынку ў кастрычніку
Размовы каля мясных шэрагаў паступова змяняюцца — пакупнікі ўсё часцей пытаюцца, якое сала лепш узяць для засолкі, якая свініна пасуе для хатніх нарыхтовак і колькі наогул будзе каштаваць закупіцца мясам на зіму.
Самы відавочны варыянт для зімовых запасаў — сала. Вялікія кавалкі на рынку цяпер прапануюць прыкладна ад 20 да 30 рублёў за кілаграм, піша Mlyn.by.
Цана залежыць ад самога кавалка: яго таўшчыні, мясной праслойкі і іншых характарыстык.
Для класічнай засолкі пакупнікі часцей выбіраюць менавіта шчыльнае сала, якое пасля прыгатавання добра трымае форму.
Калі хочацца варыянту «два ў адным», ёсць грудзінка. У ёй спалучаюцца мяса і сала, таму пасля засолкі атрымліваецца больш насычаны і сытны варыянт.
Грудзінка для засолкі — каля 25 рублёў за кілаграм.
А што з мясам?
Шыя — 25 рублёў за кілаграм, у ёй дастаткова вялікая колькасць тлушчавых праслоек: мяса атрымліваецца сакавітым і добра пасуе не толькі для шашлыку, але і для іншых спосабаў прыгатавання.
Рэбры — 25 рублёў за кілаграм.
А вось кумпяк каштуе даражэй — каля 35 рублёў за кілаграм. Гэта больш мясная частка, якую можна выкарыстоўваць для прыгатавання вэнджанага мяса.
Ёсць і самы бюджэтны варыянт — разруб свініны па 12 рублёў за кілаграм.
Для класічнай засолкі шмат прадуктаў не патрабуецца. Соль, спецыі, часнок — і аснова для хатняй закускі ўжо ёсць. Хатняе сала зусім не абавязкова павінна быць дарагім задавальненнем. Асабліва калі купляць некалькі кілаграмаў адразу і выбіраць кавалкі паводле цаны.
Парады для засолкі мяса і сала
Для класічнага сухога спосабу сала націраюць буйной соллю, дадаюць часнок і спецыі, укладваюць у ёмістасць і пакідаюць у халадзільніку на некалькі дзён. Перыядычна кавалкі можна пераварочваць, каб засолка адбывалася раўнамерна.
Галоўная парада: солі лепш не шкадаваць — сала ўбірае яе ў абмежаванай колькасці, таму перасаліць яго пры сухім спосабе складаней, чым здаецца.
Для засолкі мяса важна, каб кавалкі былі свежымі і невялікага памеру. Перад прыгатаваннем мяса добра абсушваюць, націраюць сумессю солі і спецый і прыбіраюць у халадзільнік. Час залежыць ад памеру кавалка і канкрэтнага рэцэпту.
Не варта адразу браць велізарны кавалак «на вока». Для хатняй засолкі зручней падзяліць мяса на некалькі частак — так яно прасоліцца раўнамерней, а гатовыя кавалкі можна будзе даставаць паступова.
Цяпер чытаюць
«Стрэльба калі і стрэліць, то наўрад ці кулямётнай чаргой». Максім Знак ацаніў рэальнасць пагроз беларускай прапаганды пазбавіць грамадзянства палітэмігрантаў1212
Каментары