Статкевіч: Калі Беларусь возьме ўдзел у агрэсіі супраць NATO ці стане тылам для такіх дзеянняў, то ўдар NATO па Беларусі будзе непазбежным
Мікола Статкевіч параўнаў падтрымку Лукашэнкі Крамлём з ханскім ярлыком на княжанне. За захаванне ўлады Лукашэнка плаціць усё большую цану, і гэта можа надта дорага абысціся беларусам, піша палітык.
Была ў манголаў такая традыцыя: прэтэндэнты на княскія пасады ў залежных ад іх землях павінны былі атрымаць дазвол на княжанне, адна з назваў якога — «ярлык». Каб атрымаць «ярлык», трэба было не толькі прапаўзці на жываце дзясяткі метраў у ханскую юрту, але і пагадзіцца на пэўныя саступкі і паслугі хану Арды. Матэрыяльныя ці палітычныя.
Вядома, што найбольшы плён ад тых поўзанняў, саступак ды паслуг займелі маскоўскія князі. Таму гэтая традыцыя настолькі ўкаранілася ў Маскве, што спадкаемцы тых князёў ужо самі даюць сваім сатэлітам дазвол на кіраванне паводле таго ж прынцыпу — пасля самапрыніжэння і саступак.
У найноўшай беларускай гісторыі працэдура атрымання «ярлыка» адбывалася ледзь не перад кожнымі прэзідэнцкімі «выбарамі». Схема заўсёды аднолькавая. Напярэдадні «выбараў» Крэмль дэманструе пахаладанне ў стаўленні да галоўнага кандыдата і нават імкненне падтрымаць альтэрнатыву яму. Сярод тутэйшых «сілавікоў» пачынаюцца хістанні — яны выдатна разумеюць, на чым стаіць уся сістэма. Як казаў мне адзін з іх: «Пакуль з намі Масква, а ў яе ёсць нафта, мы можам спаць спакойна». А тут нібыта ўжо «не з намі». Пачынаюцца сумненні.
Але напярэдадні «выбараў» галоўны кандыдат едзе ў Маскву. Не ведаю, як там наконт поўзання, бо ўсё адбываецца закрыта ад прэсы і публікі, але ўрэшце бакі падпісваюць дамову з чарговымі саступкамі і дэманструюць «саюзныя» адносіны. «Сілавікі» супакойваюцца і забяспечваюць звычайны вынік «выбараў».
Толькі з кожнымі новымі «выбарамі» саступкі суверэнітэту ўсё большыя.
Пасля 2020 года была саступлена наша тэрыторыя для нападу на Украіну. Цяпер Масква, паводле інфармацыі заходніх разведак, рыхтуецца да сілавых дзеянняў супраць суседніх краін NATO. Без выкарыстання нашай тэрыторыі такая справа наўрад ці абыдзецца.
Калі ж Беларусь возьме ўдзел у агрэсіўных дзеяннях супраць NATO ці стане тылам для такіх дзеянняў, то ўдар сіл NATO па нашай тэрыторыі будзе непазбежным. Незалежна ад таго, казаў пра гэта публічна ці не казаў які-небудзь натаўскі генерал.
Падобна, што кошт «ярлыка» шалёна падняўся. Але ўрэшце ён можа абысціся вельмі дорага найперш беларусам, а таксама ўсім суседнім з намі народам.
Толькі вольная, бяз’ядзерная ды нейтральная Беларусь можа прадухіліць канфлікт у Еўропе, а значыць, і ва ўсім свеце.
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары
-
Вайна будзе гибрыднай, пасля таго як РФ абламалася аб Украину са сваім прамым узброеным уварваннем, дакладней яна ўжо ідзе. Будуць дыверсіі, невядомыя людзі са зброяй без апазнавальных знакаў. Балгарыі прыгатавацца
На мой погляд, існуюць 2 памылкі інтэрпрэтацыі:
1. "Беларусь нешта зробіць і панясе адказнасць за гэта". (Як у Статкевіча: "возьме ўдзел у агрэсіўных дзеяннях супраць NATO ці стане тылам для такіх дзеянняў", у Нашай Нівы: адказ "на тых кірунках, з якіх напад будзе ажыццёўлены. Калі з Беларусі — то па Беларусі").
Не так, бо камандныя пункты СПА РФ ужо знаходзяцца ў Беларусі і пры любой агрэсіі Расеі ў рэгіёне будуць выконваць вайсковыя задачы, а таму і самі будуць законнай вайсковай мэтай.
2. Узмацненне "ўдар па вайсковых аб’ектах РФ у Беларусі" да "ўдар па Беларусі" або нават "удар па беларусах".
СМІ, палітыкі, блогеры, грамадства ўзмацняюць, бо так гучыць галасней, а зараз хто галасней, таго і пачуюць.
Не так, бо мэта не ў нейкім усталяванні справядлівасці і помсце ("а Беларусь/беларусаў за што"), а ў вайсковай логіцы прыярытэтнага знішчэння аб’ектаў ворага.
Умоўна, калі ў адказ на агрэсію РФ з Польшчы або Германіі па ваенных аб’ектах у Калінінградскай або Ленінградскай вобласці паляцяць ракеты, то радары ў Беларусі з-за геаграфічнага становішча будуць адным з галоўных трыгераў актывацыі расейскай сістэмы абароны, і таму адначасова самі стануць мэтай для знішчэння.