Пуцін заклікаў украінскія войскі ў Дэбальцаве скласці зброю: Вас перамаглі былыя шахцёры і трактарысты
Прэзідэнт Расіі Уладзімір Пуцін заклікаў украінскія войскі ў Дэбальцаве скласці зброю.
«Па ўсёй лініі судакранання больш-менш ціха, — сказаў ён у часе візіту ў Будапешт. — Трэба скончыць праблему, звязаную з аточанай групоўкай. Наша супольная задача заключаецца ў тым, каб выратаваць жыццё людзей, якія апынуліся ў гэтым «катле», і каб гэты нарыў не пагоршыў адносіны паміж афіцыйнымі ўладамі і рушэннем Данбаса», — заявіў Пуцін на прэс-канферэнцыі пасля заканчэння перамоваў з прэм'ерам Венгрыі.
На адрас Украіны ён дадаў: «Вядома, прайграваць заўсёды дрэнна, вядома, гэта заўсёды бяда для тых, хто прайграў, асабліва калі прайграеш учорашнім шахцёрам або учорашнім трактарыстам. Але жыццё ёсць жыццё, яна дакладна пойдзе далей, і я б лічыў непатрэбным на гэтым зацыклівацца», цытуе яго агенцтва ТАСС.
Апалчэнцаў жа з ДНР і ЛНР расійскі лідар заклікаў адпускаць ўкраінскіх вайскоўцаў з дэбальцаўскага «катла» да іх сем'яў.
«Тое, што там адбываецца, — гэта вытлумачальна і прагназавана, бо, па нашых дадзеных, яшчэ да сустрэчы ў Менску — за тыдзень прыкладна — групоўка ўкраінскіх войскаў там апынулася там у атачэнні».
У той жа час улады самаабвешчанай Данецкай народнай рэспублікі перасцераглі назіральнікаў АБСЕ ад наведвання Дэбальцава. Пра гэта заявіў прадстаўнік баевікоў у кантактнай групе Дзяніс Пушылін.
Дэбальцава — важны чыгуначны вузел на шляху з Данецка ў Луганск. Украінскія пазіцыі ў Дэбальцаве клінам уразаліся ў расійскія, што дазволіла расійскім сілам адрэзаць гарнізон горада. Колца вакол Дэбальцава самкнулася некалькі тыдняў таму. У аўторак баі перамясціліся ўнутр горада, падзенне якога стала непазбежным.
Расійскія сілы маюць большае і лепшае ўзбраенне, чым украінцы. Але афіцыйна Масква не прызнае свайго ўдзелу ў канфлікце, заяўляючы, што супраць украінскай арміі ваююць «мясцовыя апалчэнцы». Пры гэтым «ДНР» і «ЛНР» маюць на ўзбраенні сучасныя сістэмы залпавага агню, танкі і проціпаветраныя комплексы.
Апытанка
Цяпер чытаюць
Фатограф-агент Мішчук расказаў сваю версію таго, што адбылося11
Каментары