Каментуе старэйшы аналітык «Альпары Еўразія» Вадзім Іосуб:
«Даклад быў арыентаваны ў першую чаргу на прафесіяналаў, на банкаўскую і экспертную супольнасць. У ім агучылі, як Нацбанк бачыць працэсы ў эканоміцы, прынамсі ў той яе частцы, за якую Нацбанк адказвае. Таксама прагучаў аналіз таго, што было ў 2021 годзе і чаканні на 2022 год.
Агульны сэнс аналізу і прагнозаў дастаткова цвярозы, без шапказакідальніцтва, чым часам могуць грашыць іншыя эканамічныя ведамствы.
Мне падалося, што тут цікавыя вынікі апытанняў банкаў наконт рызыкаў, якія яны для сябе бачаць.
Здавалася б, каму якая справа да рызыкаў банкіраў, каму тое цікава? Але ж тое, што банкіры бачаць пэўныя рызыкі, значыць, што рызыкі патэнцыйна могуць прывесці да рызыкаў для ўкладчыкаў банкаў.
Група рызыкаў, якія выдзяляюцца, гэта змены дзелавой актыўнасці ў эканоміцы. Гаворка ідзе пра яе зніжэнне.
Таксама банкіры бачаць рызыку пагаршэння фінансавага становішча даўжнікоў, то-бок, патэнцыйна людзі могуць пачаць горш абслугоўваць свае даўгі перад банкамі, адпаведна, банкі могуць пачаць горш выконваць свае абавязацельствы перад укладчыкамі.
Таксама высокая рызыка знешнеэканамічных фактараў. Бо знешнеэканмічны цуд, які адбыўся ў 2021 годзе, хутчэй за ўсё не паўтарыцца ў 2022. Банкіры гэтага таксама не чакаюць. Ну і на знешнеэканамічную дзейнасць пачнуць дзейничаць санкцыйныя фактары.
Гэта тыя асноўныя рызыкі, якія бачаць банкіры, на гэта варта звяртаць увагу і ўкладчыкам.
Што тычыцца стаўкі рэфінансавання, то да, калі яна расце, то прапарцыйна растуць і стаўкі па крэдытах і дэпазітах. Але ніхто пакуль не абяцае, што яна адназначна вырасце.
З аднаго боку, стаўкі будуць намагацца трымаць вышэй за інфляцыю, разлічваючы, што пад канец года інфляцыя можа нават знізіцца да 6% (хоць персанальна я не вельмі падзяляю такі прагноз).
Але калі інфляцыя пойдзе ўніз, то і Нацбанк стаўку рэфінансавання будзе паніжаць. Таму адзначу, што заявы, што стаўку рэфінансавання дакладна будуць павышаць, не прагучала.
Увогуле, баяцца даклада не варта: ён проста адлюстроўвае сітуацыю і бачанне Нацбанкам тэндэнцый. Баяцца трэба не таго, што агучыў Калечыц, а таго, што можа адбыцца ў эканоміцы сёлета.
А можа адбыцца вось што: скончыцца знешнеэкамічны цуд, дзякуючы якому летась расла эканоміка і ўмацоўваўся беларускі рубель. Ну і сёлета будуць актыўней працаваць санкцыі.
Яшчэ адзін трывожны фактар — абвастрэнне сітуацыі на мяжы з Украінай. Калі нядаўна лічылася, што гэта праблема толькі Украіны і Расіі, то пасля таго, як у нас з’явіліся расійскія войскі, пасля адкрытай заявы, што ў выпадку канфліктаў Мінск будзе падтрымліваць Маскву і ўдзельнічаць, з’явілася новая рызыка.
Рызыка не толькі палітычная, але і эканамічная. Вось гэтых момантаў варта баяцца беларусам».
Чытайце таксама: У Расіі прагназуюць, што вайна з Украінай абрыне іх рубель на 20%. А што будзе з беларускім?
