Nacbank ahučyŭ dakład z prahnozami na 2022 hod. Čaho bajacca biełarusam?
Dakład z prahnozami na 2022 hod začytaŭ na pašyranym pasiadžeńni Nacbanka pieršy namieśnik staršyni praŭleńnia Siarhiej Kalečyc. Na 2022 hod Nacbank i ŭrad chočuć utrymać inflacyju na ŭzroŭni 6%. Sposaby źbirajucca prymianiać tyja ž. Što tyčycca staŭki refinansavańnia, ad jakoj zaležać kredyty, to jaje źbirajucca ŭtrymać na ŭzroŭni 9-10%. Jak hetyja zajavy aceńvaje ekanamist?
Kamientuje starejšy analityk «Alpary Jeŭrazija» Vadzim Iosub:
«Dakład byŭ aryjentavany ŭ pieršuju čarhu na prafiesijanałaŭ, na bankaŭskuju i ekśpiertnuju supolnaść. U im ahučyli, jak Nacbank bačyć pracesy ŭ ekanomicy, prynamsi ŭ toj jaje častcy, za jakuju Nacbank adkazvaje. Taksama prahučaŭ analiz taho, što było ŭ 2021 hodzie i čakańni na 2022 hod.
Ahulny sens analizu i prahnozaŭ dastatkova ćviarozy, biez šapkazakidalnictva, čym časam mohuć hrašyć inšyja ekanamičnyja viedamstvy.
Mnie padałosia, što tut cikavyja vyniki apytańniaŭ bankaŭ nakont ryzykaŭ, jakija jany dla siabie bačać.
Zdavałasia b, kamu jakaja sprava da ryzykaŭ bankiraŭ, kamu toje cikava? Ale ž toje, što bankiry bačać peŭnyja ryzyki, značyć, što ryzyki patencyjna mohuć pryvieści da ryzykaŭ dla ŭkładčykaŭ bankaŭ.
Hrupa ryzykaŭ, jakija vydzialajucca, heta źmieny dziełavoj aktyŭnaści ŭ ekanomicy. Havorka idzie pra jaje źnižeńnie.
Taksama bankiry bačać ryzyku paharšeńnia finansavaha stanovišča daŭžnikoŭ, to-bok, patencyjna ludzi mohuć pačać horš absłuhoŭvać svaje daŭhi pierad bankami, adpaviedna, banki mohuć pačać horš vykonvać svaje abaviazacielstvy pierad układčykami.
Taksama vysokaja ryzyka źniešnieekanamičnych faktaraŭ. Bo źniešnieekanmičny cud, jaki adbyŭsia ŭ 2021 hodzie, chutčej za ŭsio nie paŭtarycca ŭ 2022. Bankiry hetaha taksama nie čakajuć. Nu i na źniešnieekanamičnuju dziejnaść pačnuć dziejničać sankcyjnyja faktary.
Što tyčycca staŭki refinansavańnia, to da, kali jana raście, to praparcyjna rastuć i staŭki pa kredytach i depazitach. Ale nichto pakul nie abiacaje, što jana adnaznačna vyraście.
Z adnaho boku, staŭki buduć namahacca trymać vyšej za inflacyju, raźličvajučy, što pad kaniec hoda inflacyja moža navat źnizicca da 6% (choć piersanalna ja nie vielmi padzialaju taki prahnoz).
Ale kali inflacyja pojdzie ŭniz, to i Nacbank staŭku refinansavańnia budzie panižać. Tamu adznaču, što zajavy, što staŭku refinansavańnia dakładna buduć pavyšać, nie prahučała.
Uvohule, bajacca dakłada nie varta: jon prosta adlustroŭvaje situacyju i bačańnie Nacbankam tendencyj. Bajacca treba nie taho, što ahučyŭ Kalečyc, a taho, što moža adbycca ŭ ekanomicy sioleta.
A moža adbycca voś što: skončycca źniešnieekamičny cud, dziakujučy jakomu letaś rasła ekanomika i ŭmacoŭvaŭsia biełaruski rubiel. Nu i sioleta buduć aktyŭniej pracavać sankcyi.
Jašče adzin tryvožny faktar — abvastreńnie situacyi na miažy z Ukrainaj. Kali niadaŭna ličyłasia, što heta prablema tolki Ukrainy i Rasii, to paśla taho, jak u nas źjavilisia rasijskija vojski, paśla adkrytaj zajavy, što ŭ vypadku kanfliktaŭ Minsk budzie padtrymlivać Maskvu i ŭdzielničać, źjaviłasia novaja ryzyka.
Ryzyka nie tolki palityčnaja, ale i ekanamičnaja. Voś hetych momantaŭ varta bajacca biełarusam».
Čytajcie taksama: U Rasii prahnazujuć, što vajna z Ukrainaj abrynie ich rubiel na 20%. A što budzie ź biełaruskim?
Były pamočnik Łukašenki Ihar Bryło pryznaŭ, što nabraŭ chabaraŭ na $2 miljony10
Kamientary