Chronika

Biaź źmienaŭ

28 červienia Mienski haradzki sud pakinuŭ bieź źmianieńniaŭ prysud u dačynieńni da staršyni BSDP («Narodnaja hramada») Mikoły Statkieviča i adnaho ź lideraŭ «Maładoha frontu» Paŭła Sieviarynca. Zhodna z rašeńniem sudu, palityki pryhavoranyja da dvuch hadoŭ abmiežavańnia voli («chimija»).

Vyšejšy haspadarčy sud adchiliŭ pazoŭ redakcyi «Narodnaj voli» da Mininfarmacyi i pakinuŭ u sile papiaredžańnie hazecie za dźvie publikacyi, vydrukavanyja ŭviesnu. Hazeta źbirajecca abskardzić rašeńnie jašče raz — u prezydyjumie Vyšejšaha haspadarčaha sudu.

U Smurhoniach

Pradstaŭnik Smurhonskaj rajonnaj prakuratury Siarhiej Kavalčuk abskardziŭ rašeńnie sudu, jaki ŭ śniežni 2004 hodu vynies rašeńnie ab amnistyi Ramualda Ŭłana. Na dumku prakuratury, niahledziačy na amnistyju Ŭłan pavinien adbyć pakarańnie terminam adzin hod. Los byłoha deputata Smurhonskaha rajsavietu ciapier budzie vyrašać Haradzienski abłasny sud.

Levanieŭski i Marynič u bolnicy

27 červienia Valerja Levanieŭskaha pieraviali ź Ivacevickaj kalonii ŭ Respublikanskuju turemnuju bolnicu. Palitviazień maje patrebu ŭ lačeńni paśla haładoŭki — u jaho pavysiŭsia cisk i balić serca.

Tudy ž pieraviali ź mienskaj kalonii UŽ 15/1 Michaiła Maryniča z pryčyny prablem sa zdaroŭjem. 1 lipienia načalnik mienskaj kalonii Jaŭhien Łoś nie dazvoliŭ synu Paŭłu spatkacca z baćkam u bolnicy.

U Ivacevičach

29 červienia supracoŭniki Ivacevickaha RAUS skłali pratakoł na aktyvista AHP Stanisłava Chaładoviča za raspaŭsiud drukavanaj pradukcyi. Chaładovič razdavaŭ ulotki kaalicyi «5+» u vioskach Ivaceviččyny, a taksama brašuru Vasila Lavonava «Biaz prava na pamyłku».

Miravoje pahadnieńnie

29 červienia pradstaŭniki pradpryjemstva «Biełaruśkalij» prapanavali redakcyi «Narodnaj voli» mir. Pazoŭnik admaŭlajecca ad pretenzij i biare na siabie apłatu sudovych vydatkaŭ, a «Narodnaja vola» pavinna da 15 lipienia dać abviaržeńnie apublikavanych źviestak i paprasić prabačeńnie. Pazoŭ «Biełaruśkaliju» tyčyŭsia artykułu «Takaja vola narodu», dzie išła havorka pra stvareńnie hramadzkaha ruchu «Vola narodu» i śćviardžałasia, što podpisy ŭ jaho padtrymku pastavili šerah supracoŭnikaŭ pradpryjemstva.

Čučman złomak

29 červienia viciebski lider niezarehistravanaha «Maładoha frontu» Janis Čučman vyrašyŭ prasić palityčnaha prytułku ŭ Belhii.

Pryčynaju terminovaha adjezdu nazyvajecca milicejski dy sudovy pieraśled za ŭdzieł u apazycyjnych akcyjach.

Prafsajuzy vyjhrali

28 červienia sud Leninskaha rajonu Miensku pastanaviŭ spahnać siaredni zarobak za zatrymku raźliku pry zvalnieńni na karyść siabra prafsajuzu REP (AM) Maksima Vachrušava.

1 lipienia Rečycki sud abaviazaŭ pradpryjemstva «Rytm» vypłacić kampensacyju ŭ pamiery dziesiacirazovaha siaredniamiesiačnaha zarobku zvolnienym supracoŭnicam i siabram REP Irynie Papłaŭnaj i Śviatłanie Ŭschopavaj.

U Kalinkavičach

29 červienia ŭ Kalinkavičach milicyja zatrymała aktyvista niezarehistravanaha pravaabarončaha centru «Viasna» z Mazyra Ŭładzimiera Cielepuna paśla taho, jak namieśnik staršyni abłasnoj arhanizacyi AHP Uładzimier Kacora pieradaŭ jamu adramantavany pryvatny kamputar. Śledčy milicyi Surma i milicejski ekspert Valak rastłumačyli zatrymańnie tym, što hety kamputar byŭ skradzieny ŭ niejkaj nieviadomaj arhanizacyi.

U hety ž viečar u Kalinkavičach piaciora aficeraŭ milicyi, jakich uznačalvaŭ major Taran, uvarvalisia ŭ pryvatnuju kvateru na vulicy Kniazieva, 9. Tut ładziŭsia schod pa vybrańni delehataŭ na Kanhres demakratyčnych siłaŭ. Milicyjanty sprabavali sarvać vybarčy schod.

Čynoŭnik admoviŭsia

30 červienia načalnik upraŭleńnia sportu i turyzmu Haradzienskaha harvykankamu U.Čyhirynaŭ admoviŭsia dać infarmacyju žurnalistu Alaksandru Dvareckavu. Admovu čynoŭnik rastłumačyŭ tym, što «nie razmaŭlaje z volnymi žurnalistami».

U sudzie Horadni

30 červienia haradzienski abłsud nie zadavoliŭ skarhu aktyvistaŭ AHP na rašeńnie sudu. Piaciora čałaviek byli pryciahnuty da administracyjnaj adkaznaści za ŭdzieł u akcyi pamiaci Jurja Zacharanki 7 traŭnia i pakarali štrafami na 25 b.v., a były siabar BNF Raman Jurhiel atrymaŭ štraf u 160 b.v. za paŭtornaje zatrymańnie. Aktyvisty AHP buduć abskardžvać rašeńni haradzienskich sudoŭ u Viarchoŭnym sudzie.

Skrabca pakinuli ŭ turmie

1 lipienia sudździa Centralnaha rajonu Miensku Alena Iljina nie zadavoła chadajnictva Siarhieja Skrabca ab vyzvaleńni pad padpisku ab niavyjeździe. Palityk pa-raniejšamu zastajecca pad aryštam u Bieraściejskim śledčym izalatary.

Skanfiskavana 70 tysiačaŭ biuleteniaŭ

1 lipienia hrupaj supracoŭnikaŭ pravaachoŭnych arhanaŭ na vyjeździe ź Miensku byli zatrymany rehijanalnyja kaardynatary niezarehistravanaj hramadzianskaj inicyjatyvy «Partnerstva» Stanisłaŭ Šałamaŭ z Homielu, Aleh Paškievič ź Viciebsku i Ina Apanasienka ź Bieraścia. Jany byli dastaŭleny ŭ Saviecki RUUS Miensku, dzie ŭ ich kanfiskavali 70 tys. infarmacyjnych biuleteniaŭ. U hety ž dzień byŭ apiačatany haraž, što naležaŭ adnamu z aktyvistaŭ inicyjatyvy.

Schody sarvanyja

Na Viciebščynie sarvalisia try schody pa vybarach delehataŭ na Kanhres demakratyčnych sił. 2 lipienia schod nie adbyŭsia ŭ Miorach, Siańnie i Biešankovičach. Napiaredadni na sieńnienskich apazycyjaneraŭ pačaŭsia cisk, i jany admovilisia ad zaplanavanaha.

Na Dzień Respubliki

Mastak Aleś Puškin za performans, jaki jon zładziŭ a piataj ranicy 4 lipienia la budynku Nacyjanalnaha mastackaha muzeju, dastaŭleny ŭ RUUS Leninskaha rajonu. Razam ź im u milicyju trapili fotakarespandent ahienctva Associated Press Siarhiej Hryc i fotakarespandentka hazety «Naša Niva» Julija Daraškievič.

Hieneralnaha konsuła Polščy ŭ Horadni Andžeja Krantoŭskaha i staršyniu Sajuzu palakaŭ Biełarusi Anžaliku Borys nie puścili ŭ Polski dom, jaki znachodzicca ŭ Ščučynie.

Pierad pačatkam jašče adnoj akcyi suprać pierajmienavańnia — na race Śvisłač — byli zatrymany aktyvisty Partyi BNF Andrej Suchavierchi i Źmicier Kazłoŭski.

Ciarhiej Budkin

• 0
• 0
• 0
• 0
• 0
• 0
• 0
• 0