Naviny haspadarki ad 29 lipienia

Viartańnie ŭ Karalaviec

Biełaruś maje namier pabudavać port u Kalininhradzie. Naša kraina nia maje dostupu da mora, pieravoziačy štohod cieraz porty Bałtyi, Ukrainy j Rasiei 17 miljonaŭ tonaŭ tavaru. Taksama ŭ abmien na dazvoł na vyłaŭ u rasiejskich vodach 11 tysiačaŭ ton ryby, Biełaruś abaviazałasia spryjać raźvićciu rasiejskaj sielskaj haspadarki ŭ Kalininhradzkaj akruzie.

Liberalizacyja cenaŭ

Urad zaćvierdziŭ kancepcyju cenaŭtvareńnia. Zhodna ź joj, u nastupnyja piać hod dziaržava budzie kantralavać ceny na ŽKH, suviaź, transpart, taryfy ŭ hazavaj i enerhietyčnaj sferach. A voś ceny na tak zvanyja «sacyjalna značnyja» tavary buduć pastupova rabić svabodnymi.

«Džem-bank» abvinavačvajuć, «Džem-bank» abvinavačvaje

25 lipienia Nacbank uvioŭ na try miesiacy časovuju administracyju ŭ «Džem-banku». «Džem-bank» adreahavaŭ niečakanym pres-relizam, u jakim zakidaje «asobnym vysokapastaŭlenym karumpavanym čynoŭnikam» destabilizacyju stanovišča ŭ krainie pierad vybarami. U apošnim ličać, što dziaržava adpracoŭvaje na «Džem-banku» madel stvareńnia systemnaha bankaŭskaha kryzisu pierad vybarami.

«Nardzin» začynili

Vyšejšy haspadarčy sud pakinuŭ u sile rašeńnie Ministerstva achovy zdaroŭja pra anulavańnie licenzii na medyčnuju dziejnaść AAT «Nardzin». Centar užo spyniŭ svaju pracu. Što datyčycca sietki aptek «Nardzin», dyk jany pracujuć u raniejšym režymie.

«BieSTu» lhoty

Dziaržaŭny aperatar mabilnaj suviazi «BieST» nia budzie abkładacca miascovymi padatkami pry budaŭnictvie abjektaŭ sietki mabilnaj suviazi standartu GSM. Akramia hetaha, miascovyja ŭłady buduć abaviazany davać «BieSTu» płoščy dla abstalavańnia ŭ arendu pa lhotnych taryfach.

Iranski lehkavik. Dubl 2

Urad reanimuje plany stvareńnia ŭ Biełarusi vytvorčaści iranskich lehkavikoŭ. Vice-prezydent aŭtabudaŭničaj kampanii «Iran Chadro» Abduł Rachman Hałambor pryjechaŭ u Biełaruś vyvučać patencyjał rynku. Na sustrečy sa śpikieram pałaty pradstaŭnikoŭ Uładzimieram Kanaplovym iraniec paprasiŭ dziaržaŭnaj padtrymki dla realizacyi hetaha prajektu.

Bializna dla elity

Niamieckaja firma «Lanhhajnrych» budzie šyć u Biełarusi bializnu, abrusy i survetki, pryznačanyja elitnym hatelam, restaranam, a taksama bujnym mižnarodnym avijakampanijam. Firma planuje ŭkłaści 200—300 tys. eŭra ŭ pabudovu pradpryjemstva ŭ našaj krainie. Syravinu majuć nabyvać u Aršanskaha ilnokambinatu.

AK; AFN

• 0
• 0
• 0
• 0
• 0
• 0
• 0
• 0