Rajonnyja schody demakratyčnych siłaŭ pierajšli ekvatar: abrana 150 delehataŭ z 300, jakija vyłučanyja dla pradstaŭnictva miascovych supołak. Da kanca lipienia adbylisia 84 schody pa vybarach delehataŭ na Kanhres demakratyčnych siłaŭ: 75 paŭnacennych (25 udzielnikaŭ i bolš) i 9 ź niedastatkovaj kolkaściu ŭdzielnikaŭ (ad 15 da 24). Ahułam u schodach uziali ŭdzieł 3140 čałaviek.
«U kožnaj vobłaści jość miescy, dzie ich pravieści nia ŭdasca, — naprykład, va Ŭździe, — pryznajecca namieśnik staršyni Partyi BNF Viktar Ivaškievič. — Ale ja dumaju, što 2/3 delehataŭ my vybieram. Nieŭzabavie pavinny prajści schody ŭ Viciebsku, Voršy, Navapołacku, Połacku, Słucku, Salihorsku — heta z bujnych haradoŭ», — tłumačyć jon.
Partyjnaja prynaležnaść delehataŭ na siońnia vyhladaje tak:
AHP — 37;
PBNF — 36;
PKB — 23;
BSDP (H) (Kazulin) — 6;
«Małady front» — 5;
Partyja pracy — 4;
BSDP (NH) (Statkievič) — 3;
BSDH — 1;
KCHP-BNF — 1;
biespartyjnyja aktyvisty, pradprymalniki z «Perspektyvy» dy inš. — 34.
Na minułych vychadnych schody adbylisia ŭ Pastavach i Lepieli.
Na niadzielny schod demakratyčnaj hramadzkaści aziornaha kraju sabralisia 26 čałaviek. Pierad imi vystupili davierany pradstaŭnik Alaksandra Milinkieviča Vincuk Viačorka, kiraŭniki viciebskich abłasnych arhanizacyjaŭ Partyi BNF, AHP i BSDP (NH) Kastuś Smolikaŭ, Alena Zaleskaja j Alaksiej Haŭrucikaŭ. Schod vioŭ znany krajaznaŭca Michaś Hil; u pasiedžańni ŭziaŭ udzieł lehiendarny zmahar za niezaležnuju Biełaruś, viazień HUŁAHu Antoś Furs.
Delehatami na Kanhres demakratyčnych siłaŭ ad Pastaŭščyny šlacham tajemnaha alternatyŭnaha hałasavańnia vybranyja dvoje siabroŭ BSDP (Hramady).
Paśla schodu V.Viačorka, siabar Sojmu BNF Alaksiej Kavalec i mastak Aleś Cyrkunoŭ naviedali miaściny, źviazanyja z žyćciom i tvorčaściu mastaka j paŭstanca 1863 hodu Alfreda Romera. Jany ŭšanavali j uparadkavali mahiłu siabra nacyjanalna-vyzvolnych arhanizacyjaŭ, paŭstanca 1863 hodu Flaryjana Danoŭskaha ŭ Karalinavie, skulpturnaje nadmahille da jakoj ułasnaruč zrabiŭ spadar Cyrkunoŭ.
Na lepielski schod, jaki adbyŭsia ŭ pryvatnym domie, sabralisia miascovyja demakratyčnyja dziejačy, aktyvisty pradprymalnickaha ruchu, siabry kamandaŭ demakratyčnych kandydataŭ na apošnich vybarach. Pierad imi vystupili lider PKB Siarhiej Kalakin, staršynia Partyi BNF V.Viačorka, namieśnik staršyni AHP Alaksandar Dabravolski. Prysutnyja zadali haściam šmat vostrych pytańniaŭ pra stratehiju j taktyku abjadnanych demakratyčnych siłaŭ na peryjad da leta 2006 hodu, supolnuju platformu, dačynieńni z Rasiejaj.
U vyniku tajemnaha hałasavańnia schod vybraŭ svaimi delehatami na Kanhres demakratyčnych siłaŭ dvuch biespartyjnych aktyvistaŭ. Lepielskija pradprymalniki ščodra pačastavali sabranych śviežaj sadavinoj.
Arkadź Šanski
Kamientary