Razyšlisia ŭ vysnovach

U Miensku prajšła presavaja kanferencyja pa haračych śladach «čarnobylskaj spravazdačy». Pradstaŭnica AAN ličyć, što na zabrudžanych terytoryjach možna narmalna žyć, ale biełaruski bok maje namier damahacca častkovaha pierahladu draftu spravazdačy.

Džyhan Sułtanahłu, kiraŭnica pradstaŭnictva AAN/PRAAN u Biełarusi:

Eksperty zapeŭnivajuć, što škoda zdaroŭju ludziej i navakolnamu asiarodździu była mienšaj, čym pra heta zvyčajna kazali. Ludzi na zakranutych terytoryjach, za nievialikimi vyklučeńniami, mohuć vieści narmalnaje žyćcio. Eksperty ni ŭ jakim razie nie žadajuć prymienšyć čałaviečuju trahiedyju, jakuju pieražyvajuć ludzi na hetych terytoryjach. Ale Prahrama raźvićcia AAN nadzvyčajna zakłapočana ekanamičnym raźvićciom hetych rehijonaŭ i budzie nakiroŭvać svaju dziejnaść u hetym nakirunku. Prahrama CORE musić ihrać u Biełarusi navat bolšuju rolu, čym ciapier. Jana nakiravanaja na ździajśnieńnie asnoŭnych paradaŭ Vienskaha forumu: spryjańnie raźvićciu miascovaj inicyjatyvy, pradstaŭleńnie ludziam mahčymaści budavać svaju budučyniu.

Jakaŭ Kionihsberh, staršynia Nacyjanalnaj kamisii pa radyjacyjnaj abaronie, udzielničaŭ u padrychtoŭcy spravazdačy ŭ jakaści eksperta ad Biełarusi:

Prablema Čarnobylu skončycca tolki tady, kali z momantu avaryi projdzie nia mienš za 300 hod. Tady raspaducca asnoŭnyja radyjanuklidy — cezij i stroncyj. Da hetaha času prablema zastaniecca, i ŭ hetym eksperty adzinadušnyja. Što da taho, što ŭsio nibyta «dobra i viasiołkava» — ničoha padobnaha, nielha tak ličyć. Ale treba razumieć, što dziakujučy vysiłkam, jakija byli zroblenyja ŭradami Rasiei, Ukrainy i pierš za ŭsio Biełarusi (u nas byŭ samy maštabny kompleks zachadaŭ), udałosia paźbiehnuć tych žachlivych nastupstvaŭ, jakija mahli b być.

Iosif Bahdzievič, dyrektar Instytutu hlebaznaŭstva i ahrachimii Akademii navuk Biełarusi, udzielnik padrychtoŭki spravazdačy:

Forum padkreśliŭ, što ŭ dźviuch krainach — Rasiei i Ŭkrainie, dzie źnizilisia zachady pa abaronie ad radyjacyi, utrymańnie radyjanuklidaŭ u praduktach padvysiłasia. U Biełarusi ž za apošni čas utrymańnie źnižajecca. My paciarpieli bolš za ŭsich, ale nadzialali bolš uvahi prablemie. Kali pačać układać u heta mienš srodkaŭ, znoŭ stanie horš.

Alena Kupčyna, načalnica ŭpraŭleńnia humantarnaha supracoŭnictva i pravoŭ čałavieka MZS Biełarusi:

Biełaruskaja delehacyja ŭ Vienie zdoleła zafiksavać razumieńnie, što nieabchodna dapracavać prajekt vynikovaha dakumentu pa tych pytańniach, jakija ŭ toj ci inšaj stupieni nie zadavalniajuć našyja krainy. Pierš za ŭsio heta datyčycca rekamendacyjaŭ uradam paciarpiełych dziaržavaŭ. U kancy vieraśnia admysłovaja mižviedamasnaja hrupa sfarmuluje hetyja zaŭvahi, i my nakirujem ich u sakrataryjat MAHATE ŭ Vienu. Kančatkovy dakument tolki ŭ siaredzinie kastryčnika nabudzie svoj finalny vyhlad.

Uładzimier Całko, staršynia Kamitetu pa prablemach nastupstvaŭ katastrofy na Čarnobylskaj AES pry Saviecie ministraŭ:

Pryniatyja ŭ Vienie rekamendacyi nosiać ahulny charaktar, i ŭžyvać ich u kožnaj z troch krainaŭ metazhodna z ulikam nacyjanalnych asablivaściaŭ. Dla Rasiei prablema źviazana ź niedachopam srodkaŭ, jakija pastupajuć na zachady pa źnižeńni dozavych nahruzak na nasielnictva. Va Ŭkrainie isnujuć ciažkaści, źviazanyja z nadziejnaściu ŭkryćcia na 4-m bloku ČAES. U Biełarusi prablema Čarnobylu — heta prablema nacyjanalnaha ŭzroŭniu, što vyznačaje i ahulnanacyjanalnyja maštaby mierapryjemstvaŭ pa jaje pieraadoleńni. Pryznana nieabchodnym praciahnuć medycynskija daśledavańni, zasiarodzić namahańni na vyvučeńni raku ščytapadobnaj załozy i inšych vidaŭ raku, a taksama katarakty i sardečna-sasudzistych patalohijaŭ.

Vypracavanyja dva vielizarnyja navukovyja dakłady, ale ich nidzie nie drukavali. Ich jašče nidzie niama. Usie spasyłajucca na hety draft — reziume, ale jano maje palityčnaje adcieńnie. Vysnovy rabili zusim inšyja ludzi. Siudy my budziem unosić zaŭvahi. Navukovaja spravazdača — heta navukovaja spravazdača. A my dakažam zusim inšy punkt hledžańnia».

Zapisaŭ AK

• 0
• 0
• 0
• 0
• 0
• 0
• 0
• 0