Aficyjny Miensk choča spadabacca siabru Milinkieviča:)
Łukašenka prapanavaŭ novamu kiraŭnictvu Francyi naładzić "surjozny, salidny dyjaloh, jak heta było prykładna 7-10 hadoŭ tamu". Piša ŭ svaim błohu Alaksandar Kłaskoŭski.
Łukašenka prapanavaŭ novamu kiraŭnictvu Francyi naładzić "surjozny, salidny dyjaloh, jak heta było prykładna 7-10 hadoŭ tamu". Teza prahučała siońnia padčas interviju paryskaj "Mond".
Varta ŭdakładnić: "było" trochi raniej. Da referendumu-96 małady biełaruski prezydent paśpieŭ z krain staroj Eŭropy naviedać z aficyjnym vizytam mienavita Francyju. Heta mieła miesca, darečy, akurat 11 hadoŭ tamu, taksama ŭ lipieni. Pa viartańni było abvieščana pra namier pierajmać tamtejšy dośvied demakratyi. Vyhladała na toje, što najbolej spadabaŭsia termin paŭnamoctvaŭ francuskaha prezydenta — až siem hadoŭ!
Ale paśla plebiscytu-96 dy razhonu Viarchoŭnaha Savietu Eŭropa začyniła dźviery, a nieŭzabavie niepradkazalnyja naščadki Vialikaj francuskaj revalucyi ŭziali dyj absiekli, jak hiljatynaj:), kadencyju svajho prezydenta da banalnych piaci hadoŭ. Cikavaść da ichniaj demakratyi rezka asłabieła.
Zaraz na tle napružanych stasunkaŭ z Kramlom robicca sproba pierazahruzić zachodni vektar. Ale siońnia, miarkujučy pa tych frahmentach, što trapili ŭ medyi, nie prahučała ničoha pryncypova novaha ŭ paraŭnańni z užo chrestamatyjnymi interviju niemcu Raru i brytanskaj ahiencyi "Rojterz".
Tady, pa haračych śladach naftahazavaj vajny, Alaksandar Łukašenka pedalavaŭ ideju ŭzajemavyhadnaj supracy ŭ enerhietyčnaj sfery. Siońnia taksama prahučała, što ŭ dyjalohu Miensku z Eŭropaj treba zrabić akcent na enerhabiaśpieku, a nie na "niejkija efemernyja pytańni svabody medyjaŭ i h.d.".
Raźlik — na prahmatyzm eŭrapiejcaŭ, sapraŭdy zaniepakojenych vialikaj zaležnaściu ad pastavak z Rasiei. Ale reč u tym, što za minułyja paŭhodu Maskva ŭ značnaj stupieni pierakanała Eŭraźviaz: u pierabojach byŭ vinavaty niezhavorlivy biełaruski tranzyter. Akramia taho, Maskva prosta buduje truby ŭ abychod Biełarusi: Paŭnočnaeŭrapiejski hazapravod, BTS-2, "Paŭdzionny patok"... Tak što tranzytnaja vaha Biełarusi niaŭmolna źnižajecca.
Naŭrad ci budzie efektyŭnaj i sproba ŭbić klin miž Eŭraźviazam i ZŠA, akcentujučy ŭvahu na niebiaśpiecy raźmiaščeńnia ŭ Starym Śviecie elementaŭ amerykanskaj systemy PRA. Daradcy biełaruskaha lidera peŭna ž uličyli tradycyjnuju frondu Paryžu ŭ dačynieńniach z Vašynhtonam. Ale ci viedajuć u Čyrvonym domie, što svajho novaha prezydenta francuzy kličuć "Sarko-amerykaniec"? Što mienavita jon, Sarkazi (jaki navat ulubionym piśmieńnikam padkreślena nazyvaje "ianki" Cheminhueja:-) abiacaŭ damahčysia bolšaha parazumieńnia z zaakaijanskaj zvyšdziaržavaj?
Samaje ž hałoŭnaje palahaje ŭ tym, što pytańni, jakija ajčynnamu kiraŭnictvu zdajucca efemernymi, dla zachodnich demakratyjaŭ — padstavovyja. Mienavita na hetych "efemernych pytańniach" hruntujucca pretenzii da aficyjnaha Miensku, adlustravanyja ŭ pryniataj dniami Kijeŭskaj deklaracyi PA ABSE. Tak što chutčej jość efemernymi spadzievy na renesans stasunkaŭ u źviazku sa źmienaj kiraŭnictva Francyi. Bo novy prezydent vyznaje bolej enerhičny, žorstki styl zamiežnaj palityki, čym jahony papiarednik, "zastojny" Šyrak. U pryvatnaści, Sarkazi nie adnojčy sustrakaŭsia ź Milinkievičam i vykazvaŭ padtrymku baraćbie za demakratyju ŭ Biełarusi. Pryčym padkreśliŭ: mała maralnych žestaŭ — Eŭraźviaz musić dziejničać!
P.S. Francuzy, kaniešnie, nie admovilisia b pabudavać nam AES. Ale mienavita hety enerhietyčny prajekt, ci nie adziny, u jakim mahčyma maštabnaja supraca z Paryžam, moža trapić u ruki rasiejcam.
Kamientary