Što aznačaje źniaćcie amierykanskich sankcyj dla biełaruskaha kaliju
ZŠA abvieścili pra źniaćcio sankcyj ź biełaruskaha kaliju. Spytali ŭ ekśpierta, što na spravie heta moža aznačać dla «Biełaruśkalija».
Pazityŭ z abmiežavańniami
Pra źniaćcio amierykanskich sankcyj stała viadoma paśla sustrečy Łukašenki sa śpiecpasłańnikam Trampa ŭ Biełarusi Džonam Koŭłam.
Pry hetym paźniej Ministerstva zamiežnych spraŭ Litvy zajaviła, što ŭ Jeŭrapiejskim sajuzie nie viadziecca nijakich abmierkavańniaŭ nakont źmiakčeńnia sankcyj u dačynieńni da Biełarusi, što ŭ vypadku z «Biełaruśkalijem» źjaŭlajecca vielmi važnym čyńnikam.
«Pakolki ni ŭ Jeŭrasajuzie ŭ cełym, ni ŭ Litvie ŭ pryvatnaści razmoŭ pra źniaćcio sankcyj ź biełaruskaha kaliju nie idzie, to pa-raniejšamu zastajecca aktualnym pytańnie łahistyki.
Pry hetym Jeŭrasajuz važny dla biełaruskaha kaliju nie tolki z łahistyčnaha punktu hledžańnia, pakolki na jaho dolu prychodziłasia nie mienš za tracinu ad usiaho abjomu ekspartu», — ekśpiert BEROC Nastaśsia Łuzhina.
Dla paraŭnańnia, na dolu ZŠA pa vynikach 2019—2020 hadoŭ prychodziłasia ŭsiaho kala 4—4,5% ekspartu «Biełaruśkalija».
«Na hlebie nie samych lepšych adnosin pamiž ZŠA i Kanadaj źniaćcie amierykancami sankcyj z «Biełaruśkalija» adkryvaje dostup da rynku ZŠA. Tamu možna mierkavać, što biełaruski kalij moh by častkova zamianić kanadski. Ale heta vielmi daloki rynak, tamu budzie stajać pytańnie, nakolki vyhadna budzie tudy pastaŭlać pradukcyju va ŭmovach, kali dastaŭka praz Kłajpiedu zastaniecca niemahčymaj», — źviartaje ŭvahu ekanamistka.
Pry hetym padobny krok z boku ZŠA Łuzhina ŭsio adno nazyvaje važnym dla Biełarusi, pakolki kalijnaja halina istotnaja dla ekanomiki.
Pracavać stanie praściej i z trecimi krainami
Aproč taho, źniaćcie amierykanskich sankcyj z «Biełaruśkalija» moža akazać peŭny pazityŭny ŭpłyŭ i na ekspart u inšyja krainy.
«Treba razumieć, što sankcyi z boku ZŠA aznačali nie tolki toje, što amierykanskija spažyŭcy nie mohuć nabyvać kalij u Biełarusi, ale i toje, što banki nie mahli pravodzić apieracyi ŭ dalarach ZŠA na karyść klijentaŭ «Biełaruśkalija».
To-bok raźlik u dalarach byŭ niemahčymy, davodziłasia vynachodzić niejkija schiemy. Ciapier ža, kali sankcyj nie budzie, to nieabchodnaść u vykarystańni dadatkovych schiem adpadaje. Tamu padobnyja spraščeńni ŭ finansavaj halinie — heta plus ekspartu».
Na dumku ekśpiertki, mienavita palapšeńni ŭ pytańniach finansavaj łahistyki mohuć stać asnoŭnym pazityŭnym čyńnikam. Heta spraščaje mahčymaści pastavak kaliju i niedzie robić ich bolš tannymi.
ES dla biełaruskaha kaliju važniejšy za ZŠA
Tym nie mienš, heta całkam nie vyrašaje prablemu, bo biełaruski kalij pa-raniejšamu nielha pastaŭlać u Jeŭrasajuz i taksama nielha vykarystoŭvać litoŭskija party dla pastavak u trecija krainy.
Pryčym dostup da jeŭrapiejskich partoŭ važny nie tolki dla pastavak u tyja ž Štaty, ale i ŭ Indyju i Kitaj.
«Heta b adrazu źniziła sabiekošt pradukcyi, tamu źmianšeńnie vydatkaŭ na łahistyku mahło b taksama pazityŭna paŭpłyvać na prybytak «Biełaruśkalija», — adznačaje Łuzhina.
Jaki vynik mieli ahulnyja sankcyi?
Kali hladzieć, to praz sankcyi z boku ES i ZŠA dola biełaruskaha kaliju na suśvietnym rynku skaraciłasia z 20% u dasankcyjny pieryjad da kala 6% pa stanie na 2024 hod. Hetyja ličby vyrazna adlustroŭvajuć, nakolki balučymi i hłabalnymi źjaŭlalisia abmiežavańni ŭ dačynieńni da biełaruskaha kaliju.
Ciapier čytajuć
Vyzvalenyja biełaruskija palitviaźni parazmaŭlali ź Zialenskim9
Kamientary
Pieršy pradaŭ i vykinuŭ z krainy biełarusaŭ jak žyvy tavar
Druhi z metaj padhadzić Kanadzie pradaŭ uzamien źniaćcio ankcyj z raźlikaŭ, ale nadzvyčajna ŭskładnionaja łahistyka zastałasia biaz źmienaŭ.
U škłoŭskaha pirata zaraz usia nadzieja na toje, što praz zachop litoŭskich fur jon daciśnie Vilniu. A taksama na toje, što chunta nibyta adabje ŭ Litvy 14 miljardaŭ baksaŭ za błakavańnie čyhunačnaha tranzitu kalija ŭ Kłaipiedu, dziela čaho była naniataja niejkaja nadzvyčajna krutaja šviejcarskaja jurydyčnaja kantora (adrazu ž uzhadvajucca taksama dobra viadomyja šviejcarskija kantory Andava i Mabiteks). Ale niešta mianie padajecca, što ničoha tam nie atrymajecca. Maŭlaŭ, vy kuplali terminał u Kłajpiedzie dla suchich hruzaŭ. Kalij patrapiŭ pad sankcyi - ale zastajecca vieličeznaja namienkłatura inšych suchich hruzaŭ dla pieravałki. Naprykład torf albo mikaševičski hranit - voś ich i vazicie.