«A što my mahli ŭvohule čakać ad Łukašenki? Što jon nie budzie ździekavacca?» Cichanoŭskaja pra vyzvaleńnie palitviaźniaŭ i vysyłku ich va Ukrainu
Lidarka demakratyčnych sił Biełarusi Śviatłana Cichanoŭskaja prakamientavała maštabnaje vyzvaleńnie palitviaźniaŭ.
«Vielmi radujusia, što ludzi majuć mahčymaść patelefanavać svaim rodnym. I robiacca zdymki. I my vielmi rady bačyć usich ich žyvymi i zdarovymi, jak tolki možna być zdarovymi ŭ turmie», — adznačyła Śviatłana Cichanoŭskaja.
Adnak jana padkreśliła, što pieršapačatkovyja damoŭlenaści byli parušanyja aficyjnym Minskam:
«Voś, i zaraz, kaniešnie, vidavočna, što nie tak było zapłanavana, i taksama nie tak było zapłanavana i našymi amierykanskimi partniorami. My bačym, što Łukašenka ŭ apošni momant usio pierajhraŭ, kab dać razumieńnie, što jon usio kantraluje. I tut u Litvie čakali, i ŭ nas usia infrastruktura padrychtavana.
Ale ž, kaniešnie, heta inšy ŭdar. My ŭsio razam adolejem. Kaniešnie, zaraz usie razumiejuć, što treba łahistyku pierarablać. My na suviazi z polskim bokam, i z ukraincami, i z amierykancami, kaniešnie, jakija ŭsio heta kaardynujuć».
Lidarka demakratyčnych sił vykazała padziaku ŭsim, chto paspryjaŭ vyzvaleńniu:
«Vielmi važna nam padziakavać za namahańni prezidenta Trampa asabista i śpiecpradstaŭnika Džona Koŭła i Krysa Śmita. My razumiejem, jak ciažka kamunikavać z režymam. Režym choča ŭsio, dajučy mała što ŭzamien.
Zrazumieła, kožny čałaviek — heta naša kaštoŭnaść. I my tak rady bačyć na voli i Mašu [Kaleśnikavu], i Viktara Dźmitryjeviča [Babaryku], i Maksima [Znaka]. Heta, kaniešnie, niezabyŭnyja pačućci. Zaŭždy pamiatajem pra astatnich. I heta, zrazumieła, nie kaniec pieramoŭnaha pracesu».
Pra Pačobuta i śpisy vyzvalenych
Cichanoŭskaja taksama prakamientavała adsutnaść u śpisach Andžeja Pačobuta:
«Na žal, u śpisie niama Andžeja Pačobuta. My taksama jaho vielmi čakali. Ja dumaju, što i polski bok rasčaravany takim chodam padziej. Ale my viedajem, jak pracuje Łukašenka. Jon pakidaje ludziej, kab cisnuć na našych susiedziaŭ i partnioraŭ».
Cichanoŭskaja vykazała nadzieju, što ŭ chutkim časie stanie viadoma bolš pra stan vyzvalenych, jakija znachodziacca va Ukrainie:
«Ja spadziajusia, što zaŭtra my budziem viedać bolš pra los našych astatnich palitviaźniaŭ. My viedajem, što jany zaraz buduć u sanatoryi va Ukrainie. My vielmi ŭdziačny, ja pavinna padkreślić, našym ukrainskim siabram, za toje, što vielmi chutka zmabilizavalisia i zmahli pryniać našych rodnych, našych lubimych na terytoryi Ukrainy.
Zaŭtra budziem vyrašać pra łahistyku ŭ kamunikacyi z polskimi partniorami i litoŭcami, što rabić dalej, chto ŭ jakuju krainu choča, ci mahčyma heta ŭvohule».
Čamu Ukraina
Adnosna taho, što amal usie vyzvalenyja palitźniavolenyja byli vyviezieny va Ukrainu, Śviatłana Cichanoŭskaja zaŭvažyła:
«A što my mahli ŭvohule čakać ad Łukašenki? Što jon nie budzie ździekavacca, što jon humanizm niejki prajavić? Jon pracuje tak, jak jon pracuje. My viedajem, što heta za čałaviek. I my pavinny dziakavać pierš za ŭsio amierykanskim partnioram i režymu cisku na Łukašenku za toje, što jon vyzvaliŭ hetych ludziej…
I ja ŭpeŭnienaja, što jon [Łukašenka] vyzvaliŭ ich tolki tamu, što ŭsie hetyja hady byŭ cisk. I kali kažuć: «Voś, sankcyi nie pracujuć». Tak pracujuć! Jamu baluča ad hetaha! I tamu zaraz nie čas pamianšać hety cisk.
Kaniešnie, dypłamatyčnyja pieramovy patrebnyja, my zaŭsiody za heta vystupali, zaŭsiody zaklikali navat jeŭrapiejskija krainy, u jakich jość tam ambasady ŭ Miensku, kab jany vystaŭlali ŭmovy: vyzvalajcie palitviaźniaŭ, i tady možna budzie bolš-mienš razmaŭlać».
Nakont umoŭ utrymańnia va Ukrainie jana adznačyła:
«Ja nie viedaju, jakija ŭmovy vystavili ŭkraincy, bo heta ich terytoryja. Tam idzie vajna. Davajcie nie zabyvacca pra heta. Moža, im zabaranili kazać, dzie buduć raźmieščany ludzi».
Što dalej?
Paśla sustrečy ŭ ambasadzie ZŠA ŭ Vilni Śviatłana Cichanoŭskaja znoŭ koratka pahavaryła z žurnalistami, pryznaŭšysia, što paśpieła parazmaŭlać asabista tolki z Alesiem Bialackim.
«Nie mahu raskryvać sutnaść našych razmoŭ [z amierykanskimi partniorami]. Viedaju, što pieramovy byli dosyć ciažkija, ale ŭpeŭnienaja, što ŭ budučyni nastupny raŭnd budzie mieć miesca», — adznačyła jana.
Cichanoŭskaja taksama źviarnułasia da biełarusaŭ z prośbaj ab dapamozie:
«Pierš za ŭsio, kali jość mahčymaść, danaćcie na padtrymku palitźniavolenych, bo vy viedajecie, što zaraz šmatlikija arhanizacyi źbirajuć danaty. Bo na samoj spravie, vielmi ciažka bolš za sto čałaviek adrazu pryniać.
Usia infrastruktura hatovaja, ale ž ludziam patrebny buduć i reabilitacyi. My z boku palitykaŭ robim usio mahčymaje, kab zamiežny Fond padtrymki palitviaźniaŭ tolki ros. I na kožnych pieramovach my padkreślivajem, što zaraz toj momant, kali treba ŭkłaścisia ŭ hety fond».
Adkazvajučy na pytańnie pra mahčymuju nastupnuju chvalu vyzvaleńniaŭ, Cichanoŭskaja była aściarožnaj u prahnozach:
«Tut ciažka skazać. Kaniešnie, projdzie niejki čas, pakul pieramovy nie piarojduć na nastupny ŭzrovień, bo zaraz anansavali źniaćcio kalijnych sankcyj. My budziem hladzieć, jak heta pracuje. I dalej užo budzie pieramaŭlacca Džon Koŭł i pradstaŭniki inšyja».
Ciapier čytajuć
Načalnik milicyi Brahina stralaŭ u svaju žonku. Jana cudam vyžyła3
Kamientary