Kampanija Marvel zabiła Čałavieka-pavuka

Svojeasablivy kaladny padarunak padrychtavała čytačam kampanija Marvel — 26 śniežnia

vyjšaŭ apošni vypusk lehiendarnaj sieryi The Amazing Spider-Man, na staronkach jakoha Piter Parkier pamior, pakinuŭšy pierajemnikam adnaho sa svaich lutych vorahaŭ.

Zvyčajny komiks ad vydaviectva Marvel kaštuje 3 ci 4 dalary - heta lohka pravieryć praź firmiennuju anłajn-kramu kampanii abo anałahičny servis Comixology. The Amazing Spider-Man numar 700 kaštuje 7,99 dalara - za takija hrošy zvyčajna pradajecca cełaja knižka komiksaŭ z paŭnavartasnym siužetam. Što ž takoha asablivaha ŭ hetym vypusku, akramia pryhožaj ličby na vokładcy, i čamu ŭsie anłajn-resursy, pryśviečanyja komiksam, abmiarkoŭvajuć jaho ŭvieś śniežań, choć vyjšaŭ jon tolki dniami?

Pierš za ŭsio 700-y vypusk zajaŭleny jak apošni, što aŭtamatyčna nadaje jamu kaštoŭnaści ŭ vačach kalekcyjanieraŭ. Komiksy, jak i inšyja tvory ruk čałaviečych, niačasta robiacca kalekcyjnymi adrazu ŭ momant vychadu.

Čałaviek-pavuk debiutavaŭ na staronkach časopisa Amazing Fantasy numar 15, pryčym heta byŭ apošni jaho vypusk (vydańnie drenna pradavałasia), na vokładcy jakoha była paznačanaja cana ŭ 12 centaŭ. Naŭrad ci stvaralniki piersanaža Sten Li, jaki adznačyŭ 28 śniežnia 90-hodździe, i Styŭ Dzitka, jaki hadoŭ sorak nie davaŭ intervju, dumali, što ŭ 2011 hodzie hety vypusk budzie pradadzieny za 1,1 miljona dalaraŭ pryvatnamu kalekcyjanieru.

Kopii drennaj jakaści kaštujuć niekalki tysiač dalaraŭ; kopii, što idealna zachoŭvalisia ŭsie hetyja hady, pradajucca za rekordnyja sumy. Tyja, chto ŭ svoj čas nie kupiŭ komiks, choć mieŭ mahčymaść, kusajuć łokci - praź dziasiatki hadoŭ vydaŭcy achvotna prapanoŭvajuć usim achvotnym vyhadnyja doŭhaterminovyja inviestycyi. Hod tamu hałoŭny kankurent Marvel, vydaviectva DC, pierazapuściła ŭsie svaje sieryi komiksaŭ i znoŭku pačała numaracyju - tak novamu pakaleńniu kalekcyjanieraŭ ŭdałosia atrymać u svaje archivy pieršy vypusk "Betmena" i "Supiermena", chaj navat heta i nie "tyja samyja" pieršyja vypuski.

Akramia kalekcyjanieraŭ vydaŭcy ŭ takich vypadkach imknucca začapić i inšuju važnuju katehoryju spažyŭcoŭ - tych, chto hatovy kuplać zasłužanyja sieryi, ale nie viedaje, ź jakoha vypusku pačać. Ź pieršaha, piataha ci navat ź dziasiataha numaru ŭklučycca jak byccam lahčej, čym z 533-ha ci 666-ha - tamu staryja sieryi Marvel i DC časta padviarhajuć "devalvacyi". Pa prykład daloka chadzić nie treba - taja ž sieryja The Amazing Spider-Man vypuskałasia z 1963 pa 1998 hod, dajšła da 441 vypusku, a potym była zahružanaja ź pieršaha numara. Ale niaŭžo ŭ pahoni za novymi čytačami mejdžary admovilisia ad kalekcyjanieraŭ i jubilejaŭ? Nie - tamu ŭsie komiksy-doŭhažychary rana ci pozna viartajucca da staroj sistemy padliku; u 2003 hodzie "Nievierahodny Čałaviek-pavuk" byŭ uračysta pieranumaravany nazad, u suviazi z dasiahnieńniem pryhožaj ličby 500 pa ahulnaj kolkaści vypuskaŭ.

Razabraŭšysia ź ličbami, pasprabujem zrazumieć, čamu sieryju vyrašyli zakryć - niaŭžo jana drenna pradavałasia?

Viadoma, nie. Amazing amal zaŭsiody znachodzicca ŭ śpisach bestseleraŭ, bo pryśviečany samamu hałoŭnamu piersanažu Marvel. Jaho zakryvajuć, kirujučysia siužetnaj nieabchodnaściu - i tut pačynajecca samaje cikavaje (abo strašnaje, jak pahladzieć). U jakaści adkazu na letašni "pierazapusk" DC, Marvel u 2012 hodzie pravioŭ prahramu Marvel NOW! - hłabalnaje abnaŭleńnie liniejki komiksaŭ, pierakartoŭka scenarystaŭ, mastakoŭ i piersanažaŭ pamiž sieryjami, rebrendynh starych hierojaŭ, novy farmat vokładki i hetak dalej. Amazing Spider-Man niejki čas zastavaŭsia ŭbaku, bo na momant startu NOW! jon užo byŭ blizki da jubileju, ale za tydzień da Novaha hoda hienieralnaja ŭborka zakranuła i jaho.

Sa studzienia zamiest ASM budzie vychodzić novaja sieryja Superior Spider-Man, i apraŭdańnie dla jaje zapusku nadzvyčaj prostaje: u jaje budzie inšy hałoŭny hieroj.

U 698-m vypusku scenaryst Den Słot pačaŭ razyhryvać, napeŭna, hałoŭny hambit svajoj karjery, jakaja apošnija čatyry hady hruntavałasia mienavita na Čałavieku-pavuku (z 2011-ha Słot - adziny aŭtar komiksu, jaki vychodzić dva razy na miesiac).

Varjat-vučony Doktar Aktopus, što pamiraje ŭ padvodnaj turmie, realizuje svoj ašałamlalna złaviesny płan i mianiajecca ciełami ź Piteram Parkieram. Pryčym uvieś vypusk idealny čytač pra heta nie padazraje, nazirajučy da nieprystojnaści radasny dzień z žyćcia Pavuka. Tolki ŭ kancy, padčas vočnaj staŭki, hieroj pryznajecca, chto jon nasamreč.

U nastupnym numary Piter, jakomu ŭ novym ciele zastajecca žyć ličanyja hadziny, ź ciažkaściu źbiahaje z turmy, adnačasova ŭśviadomiŭšy, što antahanisty abmianialisia jašče i ŭspaminami adzin adnaho. I ŭ finalnym vypusku dvoje hienijaŭ sprabujuć adzin adnaho pierachitryć, ruchajučysia da nieminučaj raźviazki: Aktopus pamre ŭ lubym vypadku, ale niezrazumieła, čyj rozum budzie ŭ jaho ciele ŭ hetuju chvilinu.

Praŭda,

raźviazka niečakanaj nie stała - za cełyja dva tydni da aficyjnaha relizu (vielmi vialiki termin dla industryi komiksaŭ) źmiest 700-ha vypusku i šerah skanaŭ ź jaho vykłali ŭ internet.

Na hety raz vinavataha pačali šukać nie siarod niadbajnych supracoŭnikaŭ kram, jakija atrymlivajuć svaje kopii raniej za aficyjny pačatak prodažaŭ, a ŭ ofisach Marvel, adkul komiks čamuści vynieśli raniej čym treba - prynamsi, tak hučyć samaja pierakanaŭčaja hipoteza. Adzin z hałoŭnych spojleraŭ hoda vyklikaŭ siarod fanataŭ komiksaŭ davoli burnuju reakcyju, bo ŭsim padałosia, što Piter Parkier pamre ŭ ciele Aktopusa, a Aktopus zastaniecca radavacca ŭ ciele Čałavieka-pavuka; plus stała vidavočna, što hałoŭnym hierojem Superior Spider-Man budzie nie Piter Parkier.

Karcina vymaloŭvałasia šmatabiacalnaja: maŭlaŭ, Marvel zrobić supierhierojski varyjant špijonskaha trylera "Čužy siarod svaich" (Homeland), i niejki novy Čałaviek-pavuk budzie zmahacca za dobraje imia papiarednika. Dziki i adnačasova vielmi śmieły chod - śmieły dla śvietu komiksaŭ, dzie status kvo -- śviaty.

Nasamreč usio skłałasia inakš. U hetym davoli dramatyčnaha vypusku Piter Parkier, rychtujučysia pamianiacca ciełami nazad, pryznaje, što bolš nie zmoža być Čałaviekam-pavukom, bo źbirajecca zabić Aktopusa i zdradzić svaim śvietłym humanistyčnym ideałam. Na hetym momancie čytač byccam zdahadvajecca, što ŭ Parkiera budzie źmienščyk u novaj sieryi - ale płan nie spracoŭvaje.

Pierad śmierciu Piter dzielicca samymi mocnymi svaimi ŭspaminami z Aktopusam, demanstrujučy tamu šmatlikija vypadki hibieli blizkich ludziej i pavarotnyja, žorstkija momanty svajho žyćcia; hetaje adkryćcio raptam prymušaje navukoŭca, jaki nie tak daŭno ledź nie źniščyŭ usiu Ziamlu, pierahledzieć svaju sistemu kaštoŭnaściaŭ. Nadziva sumlenny Aktopus klaniecca, što stanie hierojem i budzie Čałaviekam-pavukom navat lepšym, čym sapraŭdny Piter (adsiul i nazva - superior).

Voś tak advažnaja ideja atrymała (u drennym sensie) halivudski finał i chepi-end; viadoma, za dušu Pitera Parkiera kryŭdna, ale jašče bolš kryŭdna za niepastajanstva hierojaŭ i złydniaŭ, jakim nadaješ stolki času, a jany ŭ adkaz nie mohuć być choć by paśladoŭnymi . Sa studzienia Aktopus zojmiecca ŭdaskanaleńniem kaściuma i hadžetaŭ Pavuka i, padobna, sapraŭdy budzie abaraniać śviet; Słot usio ž pakinuŭ inšym piersanažam ščylinu dla pošuku iściny, dy i naŭrad ci novy raskład siłaŭ pratrymajecca doŭha.

Pavodle dobraj tradycyi, napiaredadni vychadu filma pa komiksach Marvel pasprabuje pryvieści ich u adpaviednaść z tym, što płanujecca pakazać hledačam (naprykład, sioleta na pieršy płan terminova viarnuŭsia Jaščar - jakraz u honar svajho debiutu ŭ "Novym Čałavieku-pavuku" Marka Ueba).

Možna śmieła vykazać zdahadku, što da maja 2014 hoda, kali Endru Harfiłd druhi raz syhraje Pitera ŭ kino, u komiksach usio vierniecca na kruhi svaje, amal 40 pracentaŭ karystalnikaŭ sajta Comic Book Recources ličać, što “novy pavuk” pratrymajecca nie bolš za dva hady, i tolki dva pracenty vierać, što novaje stanovišča - nazaŭsiody.

Apošnija hady Marvel zusim užo biessaromna raskidajecca zajavami ab śmierci i ŭvaskrasieńni piersanažaŭ. Znojdziecca cudoŭnaje (a chutčej za ŭsio nie vielmi) tłumačeńnie, vyjavicca, što chtości svoječasova zasmaktaŭ dušu Parkiera kaśmičnym pyłasosam, źjavicca Djabał, ź jakim Piter nie tak daŭno zaklučaŭ pahadnieńnie, i hetak dalej. Urešcie,

u siaredzinie nulavych scenarysty ŭžo adnojčy zabili Čałavieka-pavuka - i jon uvaskros u nastupnym vypusku.

Tak što pa-sapraŭdnamu tryvožna tolki za zusim junych abo naiŭnych čytačoŭ epasu pra čyrvona-siniaha hieroja: im, što nie viedajuć pra ŭsie hetyja rekłamna-markietynhavyja chitraści i tonkaści, śviata, mabyć, papsavali. Chto viedaje, moža, ad hetaha rasčaravańnia, jakoje prymušaje fanataŭ pahražać Denu Słotu zabojstvam u Tvitary, i adbudziecca evalucyja čytackich hustaŭ.

• 0
• 0
• 0
• 0
• 0
• 0
• 0
• 0